சென்னை: தமிழ்நாடு அரசின் நகர்ப்புற வளர்ச்சித் துறையின் கீழ் செயல்படும் மாநகராட்சிகள் மற்றும் நகராட்சிகளில் சொத்து வரி வசூலிக்கப்பட்டு வருகிறது. நீண்ட காலமாக மாற்றமின்றி இருந்த சொத்து வரி, 2022ஆம் ஆண்டு அரசின் சீரமைப்புடன் உயர்த்தப்பட்டது. அதன் பின், கடந்த ஆண்டு ஜூன் மாதத்தில் சென்னை மாநகராட்சியில் சொத்து வரியை மேலும் உயர்த்தும் தீர்மானம் நிறைவேற்றப்பட்டு, அதே ஆண்டின் அக்டோபரில் நடைமுறைக்கு வந்தது.
இந்த வரி உயர்வுக்கு எதிர்க்கட்சிகள் கடும் எதிர்ப்பு தெரிவித்தன. தமிழக அரசு வரி உயர்வு குறித்து விளக்கமளிக்கும்போது, ஆண்டுதோறும் 6 சதவிகிதம் சொத்து வரி உயர்த்தப்படும் என்றது. அதன்படி கடந்த ஆண்டில் உயர்வு அமல்படுத்தப்பட்டது. இந்த நிலையில், 2025-26ஆம் நிதியாண்டில் மேலும் 6 சதவிகிதம் சொத்து வரி உயர்த்தப்பட்டுள்ளதாக சில ஊடகங்களில் செய்திகள் வெளியாகின. இந்த தகவல் பொதுமக்களிடம் பதட்டத்தை ஏற்படுத்தியது.
இது தொடர்பாக நகராட்சி நிர்வாகம் மற்றும் குடிநீர் வழங்கல் துறை முதன்மைச் செயலாளர் ஒரு முக்கிய விளக்கம் அளித்துள்ளார். அவர் கூறியதாவது, மத்திய அரசின் 15-வது நிதிக்குழுவின் நிபந்தனைகள் படி, மாநிலத்தின் மொத்த உள்நாட்டு உற்பத்தி வளர்ச்சியை அடிப்படையாகக் கொண்டு, நகர்ப்புற உள்ளாட்சி அமைப்புகள் சொத்து வரி வருவாயை 11.5 சதவிகிதமாக உயர்த்தினாலே மானியம் வழங்கப்படும் என குறிப்பிடப்பட்டுள்ளது.
இந்த நிபந்தனையின் அடிப்படையில், கடந்த 2024ஆம் ஆண்டு அக்டோபரில், அரசு அறிவாணை எண் 113-ன் மூலம் சொத்து வரி 6 சதவிகிதம் உயர்த்தப்பட்டது. அதன்பிறகு இதுவரை சொத்து வரியில் எந்தவித மாற்றமும் செய்யப்படவில்லை என்றும் அவர் தெளிவுபடுத்தினார்.
அதற்காக, தற்போதைய 2025-26 நிதியாண்டில் சொத்து வரி மீண்டும் உயர்த்தப்பட்டது என்ற தகவல் உண்மையல்ல என்றும், அது பொய்யான செய்தி என்றும் அவர் வலியுறுத்தியுள்ளார். இதனால் மக்களுக்கு எந்த புதிய வரிசுமையும் இப்போதைக்கு வராது என்பதை அரசு உறுதி செய்துள்ளது.
இந்த விளக்கத்துடன், சொத்து வரி உயர்வு தொடர்பான குழப்பங்களுக்கு முற்றுப்புள்ளி வைக்கப்பட்டுள்ளது.
