மதுரை: முன்னாள் முதல்வர் ஜெயலலிதா மரணம் குறித்து விசாரணை நடத்திய நீதிபதி ஆறுமுகசாமி அறிக்கையில் இருந்து அப்போதைய சுகாதாரத்துறை அமைச்சர் விஜயபாஸ்கர் குறித்த கருத்துகளை நீக்கி உயர்நீதிமன்ற மதுரை பெஞ்ச் உத்தரவிட்டுள்ளது. சென்னை அப்பல்லோ மருத்துவமனையில் நீண்ட காலம் சிகிச்சை பெற்று வந்த ஜெயலலிதா கடந்த 2016-ம் ஆண்டு மரணம் அடைந்தார்.
அவரது மரணம் பல்வேறு சர்ச்சைகளை கிளப்பியது. இதையடுத்து ஜெயலலிதா மரணம் குறித்து விசாரணை நடத்த நீதிபதி ஆறுமுகசாமி தலைமையில் கடந்த 2017-ம் ஆண்டு அப்போதைய முதல்வர் எடப்பாடி பழனிசாமி ஆணையம் அமைத்தார். இந்த ஆணையத்தின் விசாரணை அறிக்கையை முதல்வர் மு.க. ஸ்டாலின் 5 ஆண்டுகளுக்கு பிறகு சமர்பிக்கவிட்டது.
அந்த அறிக்கையில், ‘‘ஜெயலலிதா மரணத்தில் விஜயபாஸ்கர் உள்ளிட்டோர் குற்றவாளிகள் எனக் கண்டறிந்து அவர்கள் மீது விசாரணை நடத்த வேண்டும்’’ என்று கூறப்பட்டிருந்தது. ஆறுமுகசாமி கமிஷன் அறிக்கையில் கூறப்பட்டுள்ள கருத்துகளை நீக்கக் கோரி முன்னாள் அமைச்சர் விஜயபாஸ்கர் உயர்நீதிமன்ற மதுரைக் கிளையில் வழக்கு தொடர்ந்திருந்தார். தற்போது இந்த வழக்கின் விசாரணை முடிவடைந்த நிலையில், விஜயபாஸ்கர் கூறிய கருத்துக்களை அறிக்கையில் இருந்து நீக்கி நீதிபதி இளந்திரையன் உத்தரவிட்டுள்ளார்.
