சென்னை: பேஷன் உலகில் மேக்கப் முக்கிய இடம் வகிக்கிறது. என்னதான் மேக்கப் செய்தாலும் லிப்ஸ்டிக் இல்லாமல் மேக்கப் முடிவடையாது. உங்களின் மேக்கப்பை உயர்த்திக் காட்டுவதே லிப்ஸ்டிக் தான். அப்படிப்பட்ட லிப்ஸ்டிக்கை உங்களின் சருமத்திற்கு ஏற்றவாறு தேர்வு செய்வது எப்படி என்று இந்த பதிவில் பார்க்கலாம்.
முதலில் சரியான லிப்ஸ்டிக் வண்ணத்தைத் தேர்வு செய்வதற்கு முன்பு உங்கள் சருமத்தின் நிறம் என்ன என்பதைக் கண்டறியுங்கள். அதாவது சருமத்தின் நிறங்கள் 5 வகைகளாகப் பிரிக்கப்படுகிறது. பால் நிற வெள்ளை சருமம், வெள்ளை சருமம், நடுத்தர நிற சருமம், பழுப்பு நிற சருமம் மற்றும் கருமை நிற சருமம் ஆகும். பால் வெள்ளை மற்றும் வெள்ளை நிற சருமம் கொண்டவர்கள் பிங்க், கோரல், பீச், நியூடூ மற்றும் சிவப்பு நிற லிப்ஸ்டிக்கை தேர்வு செய்யலாம்.
நடுத்தர நிற சருமம் கொண்டவர்கள் ரோஸ், பெர்ரி, செர்ரி சிவப்பு, மற்றும் மெவ் நிற லிப்ஸ்டிக்கை தேர்வு செய்யும் போது மிக அழகாகக் காட்சியளிப்பார்கள். பழுப்பு நிற சருமம் கொண்டவர்கள் கோரல், டீப் பிங்க், பிரைட் ரெட் போன்ற வண்ணங்களைத் தேர்வு செய்யலாம். ஆனால் பிரவுன் மற்றும் வைல்ட் போன்ற வண்ணங்களைத் தவிர்க்கலாம். கருமை நிறம் கொண்டவர்கள் பிளம், கேரமல், ஒயின் போன்ற வண்ணங்களைத் தேர்வு செய்யலாம்.
உங்கள் சருமத்தின் வெப்பநிலையைப் பொருத்தும் நீங்கள் உங்களின் லிப்ஸ்டிக்கை தேர்வு செய்யலாம். மொத்தம் மூன்று வகையான சரும வெப்பநிலையில் உள்ளன. அதாவது குளிர்ந்த சருமம், வெப்பமான சருமம் மற்றும் நடுத்தர சருமம் ஆகும். குளிர்ந்த சருமம் கொண்ட பால் நிற வெள்ளை மற்றும் வெள்ளை நிறம் கொண்டவர்கள் மோச்சா அல்லது நியூடூ லிப்ஸ்டிக்கும், நடுத்தர நிறம் கொண்டவர்கள் பிங்க் அல்லது கிரண்பெர்ரி வண்ணங்களையும், பழுப்பு மற்றும் கருமை நிறம் கொண்டவர்கள் ரூபி அல்லது ஒயின் நிற லிப்ஸ்டிக்கை தேர்வு செய்யலாம்.
சூடான சரும வெப்பநிலை கொண்ட பால் நிற வெள்ளை மற்றும் வெள்ளை நிறம் கொண்டவர்கள் பலே பிங்க் அல்லது பீச் நியூடூ லிப்ஸ்டிக்கும், நடுத்தர நிறம், பழுப்பு நிறம் மற்றும் கருமை நிறம் கொண்டவர்கள் செம்பு அல்லது வெண்கல நிற லிப்ஸ்டிக்கை தேர்வு செய்யலாம். நடுத்தர சரும வெப்பநிலை கொண்டவர்கள் சூடான அல்லது குளிர்ந்த நிலையில் குறிப்பிட்டவற்றில் உங்களுக்குப் பிடித்த நிறத்தைத் தேர்வு செய்து கொள்ளலாம்.
உங்கள் உதட்டின் வடிவம் சற்று கனமாக இருந்தால் அதற்கேற்ப லிப்ஸ்டிக்கை தேர்வு செய்ய வேண்டும். அதாவது மேல் பகுதியில் கனமான உதடுகள் இருந்தால் உதடுகளின் அடிப்பகுதியில் பிரகாசமான லிப்ஸ்டிக்கும், மேல் உதட்டில் அதே நிறத்தில் சற்று இருண்ட வண்ணத்தை இடுங்கள். கீழ்ப் பகுதியில் கனமான உதடுகள் இருந்தால் உங்களுக்கு ஏற்ற லிப்ஸ்டிக்கை தேர்வு செய்துவிட்டு மேல் உதட்டின் நடுப்பகுதியில் நியூடூ லிப்ஸ்டிக் போடுங்கள்.
மேலும் உங்களுக்குச் சமச்சீரற்ற உதடுகள் இருந்தால் உதடுகளை முதலில் லிப்ஸ்டிக் பென்சில் பயன்படுத்திக் கோடிட்டுக் கொண்டு பின்னர் லிப்ஸ்டிக் பயன்படுத்துங்கள்.
