சென்னை: தமிழ்நாட்டில் 1.48 கோடி குடும்பங்கள் முதலமைச்சரின் விரிவான மருத்துவக் காப்பீட்டுத் திட்டத்தில் சேர்க்கப்பட்டுள்ளன. அந்தக் குடும்பங்களுக்கு ஆண்டுக்கு ரூ.5 லட்சம் வரை சிகிச்சைகள் வழங்கப்பட்டு வருகின்றன. இது தவிர, 8 உயர்நிலை சிகிச்சைகளுக்கு ரூ.22 லட்சம் வரை சிகிச்சைகள் வழங்கப்படுகின்றன. இந்தத் திட்டம் 942 அரசு மருத்துவமனைகள் மற்றும் 1,215 தனியார் மருத்துவமனைகள் உட்பட மொத்தம் 2,157 மருத்துவமனைகளில் செயல்படுத்தப்படுகிறது.
இவற்றில் 2,053 வகையான நோய்களுக்கு சிகிச்சை அளிக்க முடியும். கடந்த 4 ஆண்டுகளில் மட்டும் ரூ.5,500 கோடி மதிப்பிலான சிகிச்சைகள் மக்களுக்கு இலவசமாக வழங்கப்பட்டுள்ளன. அரசு மருத்துவமனைகளில் முதலமைச்சரின் காப்பீட்டுத் திட்டத்தின் கீழ் அனைத்து சிகிச்சைகளும் வழங்கப்பட்டாலும், பல தனியார் மருத்துவமனைகளில் அந்த சேவை மறுக்கப்படுகிறது. முதலமைச்சரின் காப்பீட்டுத் திட்டத்தின் கீழ் பல உயிர்காக்கும் அறுவை சிகிச்சைகளைச் செய்ய தனியார் மருத்துவமனைகள் முன்வருவதில்லை.
இதன் காரணமாக, காப்பீட்டுத் திட்ட அட்டை இருந்தாலும், அது முழுமையாகப் பலனளிக்கவில்லை என்ற குற்றச்சாட்டுகள் எழுந்துள்ளன. இந்த சூழ்நிலையில், காப்பீட்டுத் திட்டத்தின் கீழ் தனியார் மருத்துவமனைகளில் சிகிச்சை பெறுவதற்கான உரிமைகளை நோயாளிகள் அறிந்து கொள்ளும் வகையில், மொபைல் போன் செயலி மூலம் விவரங்களை வழங்க முடிவு செய்யப்பட்டுள்ளது. இது குறித்து, தமிழ்நாடு சுகாதார அமைப்பின் திட்ட இயக்குநர் டாக்டர் எஸ். வினீத் கூறியதாவது:-
முதலமைச்சரின் காப்பீட்டுத் திட்ட செபோன் மொபைல் செயலியில் பல சிறப்பு அம்சங்கள் உள்ளன. இந்த செயலி விரைவில் தொடங்கப்படும். தகுதியுள்ள எவரும் இதன் மூலம் விண்ணப்பித்து டிஜிட்டல் முறையில் காப்பீட்டு அட்டையைப் பெறலாம். அதன் பிறகு, தங்கள் குடியிருப்புக்கு அருகிலுள்ள மருத்துவமனைகளில் முதலமைச்சரின் காப்பீட்டுத் திட்டத்துடன் எந்த மருத்துவமனைகள் இணைக்கப்பட்டுள்ளன என்பதையும் அவர்கள் கண்டறியலாம்.
சிகிச்சை விவரங்கள் பற்றிய தகவல்களையும் அவர்கள் பெறலாம். பயனாளிகள் மருத்துவமனையில் சிகிச்சை பெறும்போது, அவர்களுக்கு ஒதுக்கப்பட்ட காப்பீட்டுத் தொகையின் விவரங்களையும் தங்கள் மொபைல் போனில் தெரிந்து கொள்ளலாம். முதலமைச்சரின் காப்பீட்டுத் திட்ட சேவைகளில் வெளிப்படைத்தன்மையைக் கொண்டுவரும் முயற்சியாக இந்த நடவடிக்கை எடுக்கப்பட்டுள்ளது. இவ்வாறு அவர் கூறினார்.
