இந்திய தொழில்நுட்பக் கழகம் (சென்னை ஐஐடி) ‘இன்வென்டிவ் 2025’ கண்காட்சியை வரும் பிப்ரவரி 28 மற்றும் மார்ச் 1 தேதிகளில் நடத்த இருக்கிறது. இந்த கண்காட்சி இந்திய அரசின் கல்வி அமைச்சகத்தின் ஏற்பாட்டில் நடைபெற உள்ளது. இதனை மத்திய கல்வி அமைச்சர் தர்மேந்திர பிரதான் தொடங்கிவைக்க உள்ளார்.
சென்னை ஐஐடி வளாகத்தில் நடைபெற உள்ள இந்த கண்காட்சியில், ஐஐடி-க்கள், என்ஐடி-க்கள், ஐஐஎஸ்இஆர்-கள் மற்றும் தேசிய அடிப்படை கட்டமைப்பு தரவரிசையில் இடம்பெற்ற 50 முக்கிய கல்வி நிறுவனங்களின் புத்தம் புதிய கண்டுபிடிப்புகள் காட்சிப்படுத்தப்படும். இதற்காக, 185 கண்டுபிடிப்புகளை நிபுணர் குழுவினர் ஏற்கனவே தேர்வு செய்துள்ளனர். மேலும் பல கண்டுபிடிப்புகள் இதில் சேரும் என எதிர்பார்க்கப்படுகிறது.
இந்த கண்காட்சி தொழில்துறைக்கு புதிய தொழில்நுட்பங்களை அறிமுகப்படுத்துவதுடன், நிறுவனங்களின் ஆராய்ச்சி மற்றும் மேம்பாட்டுப் பணிகளை உலகளாவிய ரீதியில் காட்சிப்படுத்தும் வாய்ப்பாக அமையும். முன்னணி தொழில்துறையினர், கல்வியாளர்கள் உள்ளிட்ட பலரும் இதில் கலந்துகொள்ள உள்ளனர்.
‘இன்வென்டிவ்’ தொடர் நிகழ்வாக 2022 ஆம் ஆண்டில் ஐஐடி டெல்லியில் முதன்முறையாக நடைபெற்றது. அப்போது, ஐஐடிக்களின் ஆராய்ச்சி மற்றும் மேம்பாட்டு பணிகள் மட்டுமே காட்சிப்படுத்தப்பட்டன. ஜனவரி 2024ல் ஐஐடி ஐதராபாத்தில் நடைபெற்ற இரண்டாவது நிகழ்ச்சியில், ஐஐடிகள் மட்டுமின்றி, ஐஐஎஸ்இஆர் மற்றும் என்ஐஆர்எப் தரவரிசையில் முதல் 50 இடங்களைப் பிடித்த கல்வி நிறுவனங்களும் கலந்துகொண்டன. இந்தத் தொடரின் மூன்றாவது நிகழ்வை தற்போது சென்னை ஐஐடி நடத்த உள்ளது.
இந்தியாவின் வளர்ச்சியில் ஆராய்ச்சி மற்றும் கண்டுபிடிப்புகளின் பங்கு மிக முக்கியமானது. 2047ஆம் ஆண்டுக்குள் இந்தியா ஒரு ஸ்டார்ட்அப் மற்றும் தயாரிப்புகளின் நாடாக உருவாகும் என்பதில் சந்தேகமில்லை. இதனை முன்னிட்டு, உயர்கல்வி நிறுவனங்களின் தொழில்நுட்பங்களை காட்சிப்படுத்தி, தொழில் மற்றும் சந்தை வாய்ப்புகளை ஏற்படுத்துவதற்கான ஒரு முக்கிய தளமாக ‘இன்வென்டிவ் 2025’ கண்காட்சி அமையும்.
