மேட்டுப்பாளையம்: மேட்டுப்பாளையத்திலிருந்து ஊட்டி வரையிலும், ஊட்டியில் இருந்து மேட்டுப்பாளையம் வரையிலும் மலை ரயில் இயக்கப்படுகிறது. வெளிநாட்டு மற்றும் உள்நாட்டு சுற்றுலா பயணிகள் மலை ரயிலில் மகிழ்ச்சியுடன் பயணிக்கின்றனர். பழமையான மலை ரயில் 2005-ம் ஆண்டு யுனெஸ்கோவால் உலக பாரம்பரிய தளமாக அறிவிக்கப்பட்டது.
இந்த சூழ்நிலையில், நேற்று முன்தினம் மேட்டுப்பாளையம்-ஊட்டி மலை ரயில் பாதையில் ஹில்குரோவ் மற்றும் ரன்னிமேடு ரயில் நிலையங்களுக்கு இடையில் திடீரென நிலச்சரிவு ஏற்பட்டு, பெரிய பாறைகள் ரயில் பாதையில் உருண்டு விழுந்தன. இதன் விளைவாக, ரயில் பாதையில் உள்ள தண்டவாளங்கள் சேதமடைந்தன. இதனால், நேற்று முன்தினம் காலை 7.10 மணிக்கு மேட்டுப்பாளையத்தில் இருந்து 184 சுற்றுலாப் பயணிகளுடன் புறப்பட்ட மலை ரயில், கல்லார் ரயில் நிலையத்தில் நிறுத்தப்பட்டது.
மண்சரிவு காரணமாக குன்னூர் நோக்கி ரயில் செல்ல முடியாததால், மீண்டும் மேட்டுப்பாளையம் ரயில் நிலையத்திற்கு கொண்டு வரப்பட்டது. இதனால், சுற்றுலாப் பயணிகள் ஏமாற்றத்துடன் திரும்பினர். ரயில் பயணிகளுக்கு கட்டணம் திருப்பித் தரப்பட்டது. நிலச்சரிவு காரணமாக, ரயில்வே உயர் அதிகாரிகளின் உத்தரவின் பேரில், குன்னூர் மலை ரயில்வேயின் ஜூனியர் பொறியாளர் தலைமையிலான ரயில்வே ஊழியர்கள் சம்பவ இடத்திற்குச் சென்று ரயில் பாதையை சரிசெய்யத் தொடங்கினர்.
ரயில் பாதையில் விழுந்திருந்த பெரிய பாறை துளையிடப்பட்டு, கம்ப்ரசர் மூலம் வெடிக்கப்பட்டது. ரயில் பாதையை சரிசெய்யும் பணி தீவிரமாக நடைபெற்று வருகிறது. இதன் காரணமாக, நேற்று 2-வது நாளாக மலை ரயில் சேவை ரத்து செய்யப்பட்டுள்ளதாக சேலம் கோட்ட ரயில்வே நிர்வாகம் அறிவித்துள்ளது. இதனால், சுற்றுலாப் பயணிகள் ஏமாற்றமடைந்துள்ளனர்.
