உதகை: நீலகிரி மாவட்டத்திற்கு வரும் சுற்றுலா பயணிகளுக்காக மேட்டுப்பாளையம் – உதகை சிறப்பு மலை ரயில் சேவை ஆகஸ்ட் மாதம் வரை நீட்டிக்கப்பட்டுள்ளதாக ரயில்வே அதிகாரிகள் தெரிவித்துள்ளனர்.
மேட்டுப்பாளையம் – குன்னூர் – உதகை இடையே ஒரு முறையும், உதகை – குன்னூர் இடையே தலா 4 முறையும் மலை ரயில் இயக்கப்படுகிறது.
கோடை சீசனில் சுற்றுலா பயணிகளின் வருகை அதிகரிப்பதால், மேட்டுப்பாளையம்-உதகை, உதகை-குன்னூர், உதகை-கெத்தி இடையே சிறப்பு மலை ரயில்களை ரயில்வே நிர்வாகம் இயக்கியுள்ளது.
சுற்றுலாப் பயணிகளிடையே பெரும் வரவேற்பை பெற்றதால், ரயில் சேவை ஜூலை வரை நீட்டிக்கப்பட்டது. இந்நிலையில், சிறப்பு மலை ரயில்கள் ஆகஸ்ட் மாதம் வரை மீண்டும் நீட்டிக்கப்படுவதாக அறிவிக்கப்பட்டுள்ளது.
இதுகுறித்து தெற்கு ரயில்வே வெளியிட்டுள்ள செய்திக்குறிப்பில் கூறியிருப்பதாவது:-
மேட்டுப்பாளையத்தில் இருந்து உதகைக்கு வரும் ஜூலை 5-ம் தேதி முதல் ஆகஸ்ட் 5-ம் தேதி வரை வெள்ளி மற்றும் ஞாயிற்றுக்கிழமைகளில் மலை ரயிலும், சனி மற்றும் திங்கள்கிழமைகளில் உதகையில் இருந்து மேட்டுப்பாளையத்துக்கு சிறப்பு ரயில்களும் இயக்கப்படும்.
மேட்டுப்பாளையத்தில் இருந்து குன்னூருக்கு 4 பெட்டிகளுடனும், குன்னூரில் இருந்து உதகைக்கு 5 பெட்டிகளுடனும் சிறப்பு மலை ரயில் இயக்கப்படும். மேட்டுப்பாளையம் முதல் குன்னூர் வரை 40 முதல் வகுப்பு மற்றும் 92 இரண்டாம் வகுப்பு இருக்கைகள் இருக்கும்.
குன்னூர் முதல் உதகை வரை மொத்தமுள்ள 228 இடங்களில் 88 முதல் வகுப்பாகவும், 140 இரண்டாம் வகுப்பாகவும் இருக்கும். மலை ரயில் மேட்டுப்பாளையத்தில் இருந்து காலை 9.10 மணிக்கு புறப்பட்டு மதியம் 2.25 மணிக்கு உட்கை சென்றடைகிறது.
மறுநாள் மலை ரயில் உட்கையில் இருந்து காலை 11.25 மணிக்கு புறப்பட்டு மாலை 4.20 மணிக்கு மேட்டுப்பாளையத்தை சென்றடையும். அதேபோல், வார இறுதி சனி மற்றும் ஞாயிற்றுக்கிழமைகளில் குன்னூரில் இருந்து காலை 8.20 மணிக்கு புறப்பட்டு 9.40 மணிக்கு உதகை சென்றடையும்.
உதகையில் இருந்து மாலை 4.45 மணிக்கு புறப்பட்டு மாலை 5.55 மணிக்கு குன்னூரை சென்றடைகிறது. இந்த சிறப்பு ரயிலில் 80 முதல் வகுப்பு மற்றும் 130 இரண்டாம் வகுப்பு இருக்கைகள் இருக்கும்.
இந்த ரயில்களில் பயணிக்க முன்பதிவு அவசியம். இவ்வாறு அந்த செய்திக்குறிப்பில் தெரிவிக்கப்பட்டுள்ளது.
