தமிழ்நாடு சட்டப்பேரவையில் இன்று பால்வளத் துறை சார்ந்த புதிய அறிவிப்புகள் வெளியிடப்பட்டன. அதன் மூலம், விவசாயிகளுக்கு ரூ.2,000 கோடி மதிப்பீட்டில் கால்நடை பராமரிப்பு கடன் வழங்கப்படும் என்று அறிவிக்கப்பட்டுள்ளது. இதன் மூலம், கால்நடை வளர்ப்பதற்கு உதவியாக இருக்கும். மேலும், ரூ.9.34 கோடி மதிப்பீட்டில் பாலின் தரத்தை மதிப்பீடு செய்யும் 1,437 பால் பகுபாய்வு கருவிகள் நிறுவப்படும் என்றும் அறிவிக்கப்பட்டுள்ளது.
புதிதாக 500 ஆவின் பாலகங்கள் திறக்கப்படும் என்றும், இது ரூ.10 கோடி மதிப்பீட்டில் அமல்படுத்தப்படுமென உறுதி செய்யப்பட்டுள்ளது. அதேபோல், ரூ.2.40 கோடி மதிப்பீட்டில் 30 தொகுப்பு பால் குளிர்விப்பான்கள் புதுப்பிக்கப்படும். மேலும், ரூ.2.23 கோடி மதிப்பீட்டில் மாதவரத்தில் உள்ள ஆய்வகம் மேம்படுத்தப்படுமென அறிவிக்கப்பட்டுள்ளது.
மேலும், ரூ.72 லட்சம் மதிப்பீட்டில் கறவை மாடுகளுக்கான தீவன விதைகள் வழங்கப்படும். அதிலும், ரூ.15 லட்சம் மதிப்பீட்டில் சிறந்த மூன்று கறவை மாடுகள் தேர்ந்தெடுக்கப்பட்டு விருது வழங்கப்படும் என கூறப்பட்டுள்ளது. இத்துடன், கறவை மாடுகளுக்கு மடி நோய் கண்டறியும் பொருட்கள் வழங்கப்படுமெனவும், 100 சிறப்பு பரிசோதனை முகாம்கள் நடத்தப்படும் எனவும் தகவல்கள் வெளியிடப்பட்டுள்ளது.
இவையேன்றி, ரூ.1.73 கோடி மதிப்பீட்டில் கறவை மாடுகளுக்கு கன்று ஈனும் இடைவெளியை குறைப்பதற்காக 2,000 மலடு நீக்க சிகிச்சைகள் மற்றும் சினை பரிசோதனை முகாம்கள் நடத்தப்படும் என்றும் அறிவிக்கப்பட்டுள்ளது. தொடக்கப்பால் உற்பத்தியாளர்கள் கூட்டுறவு சங்கங்கள் மூலம் பால் உற்பத்தியாளர்களுக்கு நுண்கடன் வழங்கும் வெண் நிதி திட்டமும் அறிமுகப்படுத்தப்பட இருக்கின்றது.
பால்வளத் துறையின் நோக்கமான மேம்பாடுகளுக்கான இந்த அறிவிப்புகள், விவசாயிகளுக்கு பல வணிகப் பெருக்கங்களையும், ஆவின் விற்பனை முகவர்களின் நலன்களையும் உறுதி செய்யும் வகையில் செயல்படுத்தப்படும்.
