சென்னை: வட சென்னை அனல் மின் நிலையத்தின் 3-வது அலகு செப்டம்பரில் முழு மின்சாரம் உற்பத்தி செய்யும் என்று மின்சார வாரிய அதிகாரிகள் தெரிவித்தனர். ரூ.10,158 கோடி செலவில் கட்டப்பட்ட வட சென்னை அனல் மின் நிலையத்தின் 3-வது அலகு கடந்த ஆண்டு மார்ச் மாதம் திறக்கப்பட்டது.
கடந்த ஆண்டு ஜூன் மாதம் சோதனை ஓட்டம் நடத்தப்பட்டு மின் உற்பத்தி தொடங்கியது. 800 மெகாவாட் திறன் கொண்ட 3-வது அலகு தற்போது சோதனை ஓட்டத்தின் போது 620 மெகாவாட் மட்டுமே உற்பத்தி செய்கிறது. மேலும், அந்த நேரத்தில், தொழில்நுட்பக் கோளாறு காரணமாக மின் உற்பத்தி நிறுத்தப்பட்டது, இப்போது நிலையான உற்பத்தி மேற்கொள்ளப்படுகிறது என்று மின்சார வாரிய அதிகாரிகள் தெரிவிக்கின்றனர்.
இருப்பினும், வணிக உற்பத்தி இன்னும் தொடங்கப்படவில்லை. வணிக உற்பத்தி என்பது மின் நிலையத்தை தொடர்ந்து 72 மணி நேரம் முழு திறனில் இயக்க வேண்டும் என்பதாகும். இது முடிந்த பின்னரே உற்பத்தி செய்யப்படும் மின்சாரத்தை விற்க முடியும். இந்த சூழ்நிலையில், அடுத்த மாதம் முதல் முழு திறனில் மின் உற்பத்தி தொடங்கும் என்று மின்சார வாரிய அதிகாரிகள் தெரிவிக்கின்றனர்.
மின்சார வாரிய அதிகாரிகள் கூறியதாவது:- வடசென்னை அனல் மின் நிலைய அலகு 3-ல் உள்ள குறைபாடுகளை சரிசெய்ய சீரமைப்பு பணிகள் மேற்கொள்ளப்பட்டு வருகின்றன. பெரும்பாலான குறைபாடுகள் சரி செய்யப்பட்டுள்ளன. சீரமைப்பு பணிகள் போர்க்கால அடிப்படையில் மேற்கொள்ளப்பட்டு வருகின்றன. மேலும், தேவைக்கேற்ப ஊழியர்கள் நியமிக்கப்பட்டுள்ளதால், செப்டம்பர் முதல் வாரத்தில் யூனிட் 3 வணிக ரீதியாக முழு திறனுடன் செயல்படத் தொடங்கும். இவ்வாறு அவர்கள் தெரிவித்தனர்.
