சென்னை: பாஜகவின் தேசிய ஜனநாயக கூட்டணியில் இருந்து வெளியேறுவதாக ஓ. பன்னீர்செல்வம் (ஓபிஎஸ்) அணியினர் அதிகாரப்பூர்வமாக அறிவித்துள்ளனர். தலைமைக் கழக நிர்வாகிகளுடன் நடைபெற்ற ஆலோசனைக்குப் பிறகு ஓபிஎஸ் ஆதரவாளர் பண்ருட்டி ராமச்சந்திரன், தற்போது எந்த கட்சியுடனும் கூட்டணி இல்லை என்று தெளிவாக அறிவித்தார்.
பிரதமர் நரேந்திர மோடி சமீபத்தில் தமிழ்நாடு விஜயம் செய்தபோது, அவரை சந்திக்க ஓபிஎஸ் முயற்சி செய்தார். ஆனால், அந்த சந்திப்புக்கு அனுமதி கிடைக்கவில்லை என தகவல்கள் கூறுகின்றன. இதுவே பாஜகவில் இருந்து விலகும் முடிவுக்கு காரணமாக கூறப்படுகிறது.
ஓபிஎஸ், கடந்த காலங்களில் பாஜகவுடன் நெருக்கம் காட்டியவர். அதிமுகவில் சசிகலா ஆட்சிக்கு எதிராக நிலைத்து நின்றதும், பின் பாஜகவுடன் மீண்டும் கை கோர்த்ததும் நினைவில் இருக்கிறது. அவரது மகன் ரவீந்திரநாத் பாஜக நிலைப்பாட்டுக்கு ஆதரவாக நாடாளுமன்றத்தில் அடிக்கடி பேசியதோடு, பிரதமரை வரவேற்கவும் ஓபிஎஸ் முனைவுடன் இருந்தார்.
ஆனால், அதிமுக தொடர்பான அனைத்து சட்ட வழக்குகளிலும் தோல்வி அடைந்த ஓபிஎஸ், பாஜக ஆதரவை முழுமையாக பெற முடியவில்லை. பிரதமர் மற்றும் அமித் ஷா, எடப்பாடி பழனிசாமியை கூட்டணியின் தலைவராக அறிவித்ததும், ஓபிஎஸை வேதனையில் ஆழ்த்தியது. இதனிடையே அவர் கூட்டணியை முறித்து வெளியேறியுள்ளார்.
இப்போது ஓபிஎஸ், விஜயின் தமிழக வெற்றிக்கழகம் (TVK) மற்றும் டிடிவி தினகரனின் அம்மா மக்கள் முன்னேற்றக் கழகத்துடன் இணையும் வாய்ப்பு இருப்பதாக அரசியல் வட்டாரங்களில் கூறப்படுகிறது. இந்த கூட்டணி உருவானால், தென் தமிழகத்தில் அதிமுக கூட்டணிக்கு மிகப்பெரிய போட்டியாக உருவாகும். ஏற்கனவே 2024 நாடாளுமன்றத் தேர்தலில் 18% வாக்குகள் ஓபிஎஸ் மற்றும் தினகரனின் பங்களிப்பால் தேசிய ஜனநாயகக் கூட்டணிக்கு கிடைத்ததாக மதிப்பீடு உள்ளது.
இந்த அரசியல் நகர்வுகள் நடக்கும்போது, இன்று காலை முதல்வர் மு.க. ஸ்டாலின் மற்றும் ஓபிஎஸ் இருவரும் அடையார் பூங்காவில் நடைப்பயிற்சிக்காக வந்த போது சந்தித்தனர். இது யதார்த்தமானதா அல்லது அடுத்த கூட்டணிக்கு அடிப்படை வெய்யப்படுகிறதா என்பதுதான் தற்போது எழும் கேள்வி.
