உதவிப் பேராசிரியர் பணிக்கான சிஎஸ்ஐஆர் நெட் தேர்வுக்கான விண்ணப்பங்களில் திருத்தம் செய்ய என்டிஏ வாய்ப்பு அளித்துள்ளது. நம் நாட்டில் பல்கலைக்கழகங்கள் மற்றும் கல்லூரிகளில் உதவிப் பேராசிரியராகப் பணிபுரியவும், முதுகலை ஆராய்ச்சி படிப்புக்கு மத்திய அரசின் உதவித்தொகை பெறவும் நெட் தகுதித் தேர்வில் தேர்ச்சி பெற வேண்டும். தேசிய தேர்வு முகமையால் (என்டிஏ) கணினியில் ஆண்டுக்கு இருமுறை இந்தத் தேர்வு நடத்தப்படுகிறது.
இதில், சிஎஸ்ஐஆர் நெட் தேர்வு சில அறிவியல் பாடங்களுக்கு பிரத்யேகமாக நடத்தப்படும். அதன்படி, இந்த ஆண்டுக்கான சிஎஸ்ஐஆர் நெட் தேர்வு பிப்ரவரி 16-ம் தேதி முதல் 28-ம் தேதி வரை நடைபெற உள்ளது. இதற்கான ஆன்லைன் விண்ணப்ப பதிவு டிசம்பர் 9-ம் தேதி தொடங்கி ஜனவரி 2-ம் தேதி முடிவடைந்தது. இப்போது பட்டதாரிகளுக்கு இதில் திருத்தம் செய்ய என்டிஏ அவகாசம் அளித்துள்ளது. அதன்படி, விருப்பமுள்ளவர்கள் ஜனவரி 4 மற்றும் 5 ஆகிய தேதிகளில் /csirnet.nta.ac.in/ என்ற இணையதளம் மூலம் திருத்தம் செய்யலாம்.
மேலும், தேர்வுக்கான ஹால் டிக்கெட் வெளியீடு உள்ளிட்ட கூடுதல் விவரங்களை /nta.ac.in/ என்ற இணையதளத்தில் தெரிந்து கொள்ளலாம். விண்ணப்பிப்பதில் ஏதேனும் சிரமங்கள் இருந்தால், மாணவர்கள் அலுவலகத்தை 011-40759000/ 69227700 என்ற எண்ணில் தொடர்பு கொள்ளலாம் அல்லது csirnet@nta.ac.in என்ற மின்னஞ்சல் முகவரியில் தெளிவுபடுத்தலாம் என்று என்டிஏ வெளியிட்டுள்ள செய்திக்குறிப்பில் தெரிவிக்கப்பட்டுள்ளது.
