சென்னை: இலங்கையில் குடும்பத்துடன் வசித்து வந்த சரவணமுத்து, அங்கு நடந்த உள்நாட்டுப் போர் காரணமாக 1984-ம் ஆண்டு தனது மனைவி தமிழ்செல்வியுடன் இலங்கையில் இருந்து கோவைக்கு அகதிகளாக வந்தார். சரவணமுத்துவின் தந்தை பழனிவேல் புதுக்கோட்டையைச் சேர்ந்தவர். பின்னர் சரவணமுத்து, தமிழ்செல்வி ஆகியோர் வெளிநாட்டினர் மண்டல பதிவு அலுவலகத்தில் பதிவு செய்து கோவையில் வசித்து வந்தனர். 1987-ம் ஆண்டு இவர்களுக்கு ரம்யா என்ற பெண் குழந்தை பிறந்தது.
கோவையில் பெற்ற பிறப்புச் சான்றிதழ், வாக்காளர் சான்றிதழ் என அனைத்துச் சான்றிதழ்களையும் ரம்யா வைத்திருந்ததோடு, பாஸ்போர்ட்டும் பெற்றுள்ளார். பள்ளிப் படிப்பை முடித்து, கோவையைச் சேர்ந்த புருஷோத்தமன் என்பவரை 2014-ல் திருமணம் செய்த ரம்யாவுக்கு, ருத்ரன் (9) என்ற மகன் உள்ளார். ருத்ரன் கோவையில் முறையான பிறப்புச் சான்றிதழும் வைத்திருக்கிறார். ரம்யா கோவையில் உள்ள தனியார் நிறுவனத்தில் கணக்காளராக பணியாற்றி வருகிறார்.
இந்நிலையில், ரம்யாவின் பெற்றோர் இந்தியாவில் தங்கியிருந்த பதிவை புதுப்பிக்க மறுத்த அதிகாரிகள், ரம்யாவும் இலங்கை சென்று, முறையான இந்திய விசா மூலம் இந்தியா வந்தால், அவரது குடியுரிமை பரிசீலிக்கப்படும் என்றும், ரம்யாவின் இந்திய பாஸ்போர்ட்டை ஒப்படைக்க வேண்டும் என்றும் உத்தரவிட்டனர். இதை எதிர்த்து, இந்தியாவில் பிறந்த தனக்கு இந்திய குடியுரிமை வழங்க மத்திய அரசுக்கு உத்தரவிடக் கோரி, சென்னை உயர் நீதிமன்றத்தில் ரம்யா வழக்கு தொடர்ந்தார். இந்த வழக்கு நீதிபதி டி.பாரத் சக்கரவர்த்தி முன் விசாரணைக்கு வந்தது.
அப்போது, மனுதாரர் தரப்பில் வழக்கறிஞர் எஸ்.இளமுகில் ஆஜராகி, “இந்தியரை திருமணம் செய்து 7 ஆண்டுகள் இந்தியாவில் தங்கியிருந்தால் மட்டுமே இந்திய குடியுரிமை பெற தகுதியுடையவர். எனவே, பிறப்பு அடிப்படை மறுக்கப்பட்டாலும், திருமண அடிப்படையிலும், மனுதாரரின் தாத்தா, பாட்டி இந்தியர்கள் என்ற அடிப்படையிலும் இந்திய குடியுரிமை வழங்க வேண்டும். “ஜூலை 1, 1987-க்குப் பிறகு இந்தியாவில் பிறந்தவர்களின் பெற்றோரில் ஒருவர் இந்தியராக இருந்தால் மட்டுமே அந்தக் குழந்தைகளுக்கு இந்தியக் குடியுரிமை வழங்கக் கோரிக்கை வைக்க முடியும்” என்று மத்திய அரசு தரப்பில் தெரிவிக்கப்பட்டது.
இருதரப்பு வாதங்களையும் கேட்ட நீதிபதி, “மனுதாரர் இந்தியாவில் பிறந்து இந்தியரை மணந்தவர் மட்டுமின்றி, 9 வயது இந்தியக் குழந்தைக்கு தாயும் ஆவார். கடந்த 37 ஆண்டுகளாக தமிழகத்தில் குடும்பத்துடன் வசிக்கும் போது, இலங்கைக்கு சென்று பெற்றோரிடம் ஆவணங்களை பெறுமாறு அதிகாரிகள் கூறுவதில் அர்த்தமில்லை. இந்த மனுவை மத்திய அரசு சட்டப்படி பரிசீலித்து உரிய முடிவு எடுக்க வேண்டும். அதுவரை மனுதாரரையும், அவரது பெற்றோரையும் இந்தியாவிலிருந்து நாடு கடத்தக் கூடாது” என்று மத்திய அரசுக்கு உத்தரவிட்டு வழக்கை முடித்து வைத்தார்.
