சென்னை: மும்பை ரயில்வேக்கு ஏசி மின்சார ரயில்கள் தயாரிக்கப்பட்டு வழங்கப்பட்டு வருவதால், அடுத்த நிதியாண்டில் (2025-26) சென்னைக்கு ஏசி புறநகர் மின்சார ரயில் தயாரிக்கத் திட்டமிட்டுள்ளதாக ஐசிஎஃப் அதிகாரிகள் தெரிவித்தனர்.
சென்னை ஐசிஎஃப் உலகப் புகழ்பெற்ற கோச் தயாரிப்பு தொழிற்சாலை. இங்கு பல்வேறு வகையான 75 ஆயிரத்துக்கும் மேற்பட்ட ரயில் பெட்டிகள் தயாரிக்கப்பட்டு வழங்கப்பட்டுள்ளன. தற்போது, வந்தே பாரத் ரயிலை தயாரிப்பதில் கவனம் செலுத்தப்படுகிறது. இது தவிர, நவீன எல்எச்பி பெட்டிகள், ஏசி மின்சார பெட்டிகள் உள்ளிட்ட பல்வேறு பெட்டிகள் தயாரிக்கப்படுகின்றன. இதன் ஒரு பகுதியாக, தெற்கு ரயில்வேக்கு 2 ஏசி மின்சார ரயில்களை தயாரித்து வழங்கவும் திட்டமிடப்பட்டுள்ளது.
இந்த ரயில்களில் ஒன்று டிசம்பரில் தயாரிக்கப்பட்டு வழங்கப்படும் என்று ஐசிஎஃப் கடந்த மாதம் தெரிவித்திருந்தது. இந்நிலையில் இந்த ரயில் தயாரிப்பு பணி மேலும் தாமதமாகும் என தகவல் வெளியாகியுள்ளது. அதாவது, அடுத்த நிதியாண்டில் உற்பத்தியை தொடங்க திட்டமிடப்பட்டுள்ளது.
சென்னை ஐசிஎப் அதிகாரிகள் கூறியதாவது:- சென்னை ஐசிஎப்-ல் தற்போது நவீன ரக பெட்டிகள் தயாரிக்கப்படுகின்றன. மேலும், ஏசி மின்சார ரயில் உற்பத்தியும் நடந்து வருகிறது. வந்தே பாரதம் போல இருப்பதால், ரயிலில் ஒருவர் எளிதாக ஒரு முனையிலிருந்து மறுமுனைக்கு பயணிக்க முடியும். அதிகபட்ச வேகம் மணிக்கு 110 கி.மீ. வேகத்திறன் கொண்டது. தானியங்கி கதவுகள், ஜிபிஎஸ் அடிப்படையிலான இன்ஃபோடெயின்மென்ட் மற்றும் அறிவிப்பு வசதிகளும் உள்ளன.
அனைத்து பெட்டிகளிலும் சிசிடிவி கேமராக்கள் பொருத்தப்பட்டுள்ளன. இந்த நிதியாண்டில் மும்பை ரயில்வே கோட்டத்திற்கு 4 ஏசி மின்சார ரயில்களை தயாரித்து வழங்க ரயில்வே வாரியம் ஐசிஎஃப்-க்கு உத்தரவிட்டுள்ளது. அதன்படி, முதல் ஏசி ரயில் தயாரிக்கப்பட்டு அனுப்பப்பட்டுள்ளது. மீதமுள்ள 3 ஏசி ரயில்கள் கட்டப்பட்டு வருகின்றன. அதன்படி சென்னைக்கு ஒதுக்கப்பட்ட 2 ஏசி ரயில்களின் உற்பத்தியை அடுத்த நிதியாண்டில் தொடங்க திட்டமிடப்பட்டுள்ளது. இவ்வாறு அவர்கள் கூறினர்.
