பிரபல தனியார் தொழில் குழுமத்தின் சொத்து முடக்கம்@சென்னை

சென்னை: சென்னையை தலைமையிடமாகக் கொண்டு செயல்படும் தனியார் நிறுவனங்களின் ரூ.298 கோடி மதிப்பிலான அசையா சொத்துகளை அமலாக்க இயக்குனரகம் முடக்கியுள்ளது.

சிமென்ட், ரியல் எஸ்டேட், ஏற்றுமதி, இறக்குமதி, மின் உற்பத்தி என பல்வேறு நிறுவனங்கள் சென்னையை சேர்ந்த தனியார் தொழில் குழுமத்தின் தலைமையகத்தின் கீழ் நாடு முழுவதும் செயல்பட்டு வருகின்றன. இந்நிலையில், அந்த நிறுவனம் வரி ஏய்ப்பில் ஈடுபட்டதாக புகார் எழுந்தது. இதையடுத்து, கடந்த 2015 மற்றும் 2020ம் ஆண்டுகளில் குரூப் நிறுவனங்களுக்கு சொந்தமான சென்னை உள்ளிட்ட 50க்கும் மேற்பட்ட இடங்களில் வருமான வரித்துறையினர் சோதனை நடத்தினர்.

இந்த சோதனையில் பல கோடி மதிப்புள்ள பணம், தங்கம், வெள்ளி நகைகள், சொத்துக்கள் மற்றும் முக்கிய ஆவணங்கள் கைப்பற்றப்பட்டன. அதில் சட்டவிரோத பணப் பரிவர்த்தனை தொடர்பான ஆவணங்களும் சிக்கியுள்ளன. இதையடுத்து, அந்நிறுவனத்துக்குச் சொந்தமான இடங்களில் அமலாக்கத் துறை கடந்த ஆண்டு அதிரடி சோதனை நடத்தியது. கைப்பற்றப்பட்ட ஆவணங்களின் அடிப்படையில், குழுவின் ரூ.360 கோடி வங்கி டெபாசிட்களை அமலாக்க இயக்குனரகம் முடக்கியது.

மேலும், விசாகப்பட்டினம் துறைமுகத்தில் இருந்து நிலக்கரி கையாளப்பட்டதில் ரூ.900 கோடி ஊழல் நடந்துள்ளது தெரியவந்துள்ளது. இது தொடர்பாக விசாரணை நடந்து வரும் நிலையில், குழுமத்துக்கு சொந்தமான ரூ.298 கோடி மதிப்பிலான அசையா சொத்துகளை முடக்கி அமலாக்கத்துறை நடவடிக்கை எடுத்துள்ளது.