மானாமதுரை : ஆங்கிலேயர் காலத்தில் இருந்து ராமேஸ்வரம், மதுரை, விருதுநகர், காரைக்குடி ஆகிய நான்கு வழித்தடங்களில் இருந்து வரும் ரயில்கள் சந்திப்பாக மானாமதுரை ரயில் நிலையம் செயல்பட்டு வருகிறது. மானாமதுரை மற்றும் ராமேஸ்வரம் இடையே அகல ரயில் பாதை, ஆகஸ்ட் 12, 2007 அன்று திறக்கப்பட்டது. திருச்சி, மதுரை மற்றும் விருதுநகர் வழித்தடங்களில் மானாமதுரை ரயில் நிலையம் வழியாக தினமும் 26 ரயில்கள் வந்து செல்கின்றன.
இதில் இரண்டு எக்ஸ்பிரஸ் ரயில்கள் இரவு 7.10 மற்றும் 10.20 மணிக்கு சென்னைக்கு புறப்படுகின்றன. இது தவிர வாரணாசி, அயோத்தி, புவனேஸ்வர், ஓகா, திருப்பதி, கன்னியாகுமரி, கோயம்புத்தூர், எர்ணாகுளம், புதுச்சேரி உள்ளிட்ட முக்கிய நகரங்களுக்கு வாராந்திர ரயில்கள் மானாமதுரை வழியாக இயக்கப்படுகின்றன, மேலும் இந்த ரயில்களுக்கு மானாமதுரை ரயில் நிலையத்தில் தினமும் நூற்றுக்கணக்கானோர் டிக்கெட் முன்பதிவு செய்கின்றனர்.
இந்த ரயில் நிலையத்தில் முதல் மற்றும் இரண்டாம் வகுப்பு தூங்கும் அறைகள் உள்ளன, மேலும் குறிப்பிட்ட நீண்ட தூர ரயில்களுக்காக காத்திருக்கும் பயணிகளின் குழந்தைகள் மற்றும் மானாமதுரை ரயில் நிலையத்தில் பணிபுரியும் ஊழியர்களின் குழந்தைகளை மகிழ்விக்க சிறுவர் பூங்கா அமைக்கப்பட்டது. இந்த பூங்காவில் ஸ்லைடு, பார்கள், ஊஞ்சல்கள், நடைபாதை, மலர் செடிகள் இருந்த நிலையில், 2011-ம் ஆண்டுக்கு பின், இங்குள்ள விளையாட்டு உபகரணங்கள் சேதமடைந்தன.
அதன்பின், பூங்காவில் கருவேல மரங்கள், புதர்கள் வளர்ந்து, உடைந்த விளையாட்டு உபகரணங்கள் இடித்து அகற்றப்பட்டன. இதனால், ரயில்வே ஊழியர்களின் குழந்தைகளும், ரயில் பயணிகளின் குழந்தைகளும் பொழுதுபோக்கின்றி தவித்து வருகின்றனர். இந்த பூங்காவை சீரமைக்க வேண்டும் என கோரிக்கை விடுத்துள்ளனர். சமூக ஆர்வலர் சண்முகம் கூறுகையில், ”மானாமதுரை ரயில் நிலையத்திற்கு தினமும் ஆயிரக்கணக்கான பயணிகள் வந்து செல்கின்றனர்.
நீண்ட தூர ரயில்களுக்காக காத்திருக்கும் பயணிகளின் குழந்தைகள் மற்றும் மானாமதுரை ரயில் நிலையத்தில் பணிபுரியும் ஊழியர்களின் குழந்தைகளை மகிழ்விக்க சிறுவர் பூங்கா அமைக்கப்பட்டது. தற்போது பூங்கா அகற்றப்பட்டதால் ரயில்வே ஊழியர்களின் குழந்தைகளும், ரயில் பயணிகளின் குழந்தைகளும் பொழுதுபோக்க வழியின்றி தவித்து வருகின்றனர். இந்த பூங்காவை சீரமைக்க மதுரை கோட்ட ரயில்வே நிர்வாகம் நடவடிக்கை எடுக்க வேண்டும்” என்றனர்.
