சென்னை: சென்னை அண்ணா பல்கலைக்கழக வளாகத்தில் கடந்த 23-ம் தேதி இரவு பொறியியல் மாணவி பாலியல் பலாத்காரம் செய்யப்பட்டார். இதுதொடர்பாக கோட்டூரைச் சேர்ந்த ஞானசேகரன் என்பவர் கைது செய்யப்பட்டார். இந்த வழக்கின் முதல் தகவல் அறிக்கை (எப்ஐஆர்) பொதுவெளியில் வெளியாகி பரபரப்பை ஏற்படுத்தியது. இந்த வழக்கில், அரசுக்கு பல்வேறு உத்தரவுகளை பிறப்பித்த நீதிமன்றம், 3 ஐபிஎஸ் அதிகாரிகள், துணை போலீஸ் கமிஷனர்கள் புக்ய சினேகா பிரியா (சென்னை அண்ணாநகர்), அய்மன் ஜமால் (ஆவடி), பிருந்தா (சேலம்) ஆகியோர் கொண்ட சிறப்பு புலனாய்வு குழுவை அமைத்தது.
இதையடுத்து, கோட்டூர்புரம் மகளிர் காவல் நிலைய போலீஸார் பதிவு செய்த எப்ஐஆர் மற்றும் கைது செய்யப்பட்ட ஞானசேகரன் விவரம் சிறப்பு புலனாய்வுக் குழுவிடம் ஒப்படைக்கப்பட்டது. இந்நிலையில் சிறப்பு புலனாய்வு குழு போலீசார் நேற்று மதியம் 1.30 மணியளவில் அண்ணா பல்கலைக்கழகத்திற்கு சென்று விசாரணை நடத்தினர். அவர்கள் பல்கலைக்கழக நிர்வாகிகள், ஊழியர்கள், காவலர்கள் மற்றும் ஊழியர்களிடம் குறிப்பாக விசாரித்தனர். மாணவி வன்கொடுமைக்கு ஆளான இடத்தை ஆய்வு செய்தனர்.
மாணவியின் பெற்றோர், பாதிக்கப்பட்ட மாணவி மற்றும் சம்பவத்தன்று மாணவனுடன் இருந்த மாணவனிடம் சம்பவம் குறித்து கேட்டறிந்து குறிப்புகளை எடுத்தனர். பல்கலைக்கழக வளாகத்தில் பொருத்தப்பட்டுள்ள 139 கேமராக்கள் எந்தெந்த இடங்களில் உள்ளன, அவற்றில் எத்தனை செயல்பாட்டில் உள்ளன என்பது உள்ளிட்ட விவரங்களையும் சேகரித்தனர். பின்னர், மாலை 3.30 மணியளவில் விசாரணையை முடித்துக்கொண்டு திரும்பினர். கிடைத்த தகவலின் அடிப்படையில் அடுத்த கட்ட விசாரணையை சிறப்பு புலனாய்வு குழு மேற்கொள்ளும்.
தேசிய மகளிர் ஆணையத்தின் உண்மை அறியும் குழு கடந்த செவ்வாய்க்கிழமை அண்ணா பல்கலைக்கழகத்தில் விசாரணை நடத்தியது குறிப்பிடத்தக்கது. இதற்கிடையில் ஞானசேகரனிடம் இருந்து கைப்பற்றப்பட்ட செல்போனை சைபர் கிரைம் போலீசார் உதவியுடன் தனிப்படையினர் ஆய்வு செய்து வருகின்றனர். அதில் எத்தனை வீடியோக்கள் இருந்தன, எத்தனை நீக்கப்பட்டன, யாருக்கு ஷேர் செய்யப்பட்டன என்பது குறித்து தீவிர விசாரணை நடந்து வருகிறது. 6 மாத அழைப்பு விவரங்களை போலீசார் சேகரித்து வருகின்றனர்.
