தமிழக முதலமைச்சர் மு.க. ஸ்டாலின், கூட்டாட்சி அமைப்பை வலுப்படுத்த வேண்டும் என்ற கோரிக்கையுடன் பல்வேறு மாநில முதலமைச்சர்கள் மற்றும் கட்சித் தலைவர்களுக்கு கடிதம் எழுதியுள்ளார். இந்திய அரசமைப்பின் அடித்தளமான கூட்டாட்சியை மீண்டும் வலுப்படுத்த வேண்டும் என்பதே இதன் நோக்கம் என அவர் வலியுறுத்தியுள்ளார். 1935ஆம் ஆண்டு இந்திய அரசுச் சட்டத்தை அடிப்படையாகக் கொண்டு வடிவமைக்கப்பட்ட அரசமைப்பு, ஒன்றியம் மற்றும் மாநிலங்களுக்கு இடையே சமநிலையுடன் அதிகாரப் பகிர்வு ஏற்படுத்தியது. ஆனால் கடந்த பல ஆண்டுகளில் அந்த சமநிலை ஒன்றிய அரசின் பக்கம் சாய்ந்து கொண்டே வந்துவிட்டது என்று அவர் குறிப்பிட்டுள்ளார்.
முன்னாள் தலைவர்கள் சி.என். அண்ணாதுரை மற்றும் கலைஞர் கருணாநிதி கூட்டாட்சிக்காக போராடிய வரலாற்றையும் ஸ்டாலின் தனது கடிதத்தில் நினைவூட்டியுள்ளார். குறிப்பாக, 1971ஆம் ஆண்டில் உருவாக்கப்பட்ட ராஜமன்னார் குழுவின் அறிக்கையும், பின்னர் நடைபெற்ற சட்டமன்ற தீர்மானமும் கூட்டாட்சி விவாதங்களில் மைல்கல்லாக அமைந்ததைக் கூறியுள்ளார். இருந்தும், அதன் பின் அமைக்கப்பட்ட சர்க்காரியா கமிஷன் மற்றும் புஞ்சி கமிஷன் போன்ற குழுக்களின் பரிந்துரைகள் முழுமையான கூட்டாட்சியை நிலைநிறுத்தவில்லை என்று அவர் சுட்டிக்காட்டியுள்ளார்.
தற்போது ஒன்றிய அரசு பல அமைச்சகங்கள் மூலம் மாநிலங்களுக்கு நேரடி தலையீடு செய்யும் நிலை ஏற்பட்டிருப்பதாகவும், மானிய நிபந்தனைகள் மற்றும் திட்ட ஒப்புதல்கள் மாநில முன்னுரிமைகளை பாதிக்கின்றன என்றும் ஸ்டாலின் விமர்சித்துள்ளார். இதனைத் தடுக்கவே, ஓய்வு பெற்ற உச்ச நீதிமன்ற நீதிபதி குரியன் ஜோசப் தலைமையில் உயர்நிலைக் குழுவை தமிழக அரசு அமைத்துள்ளதாகவும் அவர் தெரிவித்துள்ளார். இந்தக் குழு, உண்மையான கூட்டாட்சியை வலுப்படுத்தும் முன்மாதிரியை உருவாக்கும் பொறுப்பில் உள்ளது.
அத்துடன், மாநிலங்களின் கருத்துகளை சேகரிக்க இணையவழி வினாத்தாள் வெளியிடப்பட்டதாகவும், அனைத்து மாநிலங்களும் தங்கள் பங்களிப்பை வழங்க வேண்டும் என்றும் ஸ்டாலின் கேட்டுக்கொண்டுள்ளார். https://hicusr.tn.gov.in என்ற இணையதளத்தில் கேள்வித்தாளை நிரப்பும் வசதி ஏற்படுத்தப்பட்டுள்ளது. இந்தியாவின் வளர்ச்சிக்கான பாதை வலுவான ஒன்றியமும் வலுவான மாநிலங்களுமே என அவர் வலியுறுத்தியுள்ளார்.
