சென்னை: இஸ்ரோவின் விண்வெளி ஆய்வு மைய திட்டத்தின் முன்னோட்டமாக, பிஎஸ்எல்வி சி-60 ராக்கெட் மூலம் ஸ்பேடெக்ஸ் விண்கலம் இம்மாத இறுதிக்குள் விண்ணில் ஏவப்பட உள்ளது. இந்திய விண்வெளி ஆராய்ச்சி நிறுவனம் (இஸ்ரோ) விண்வெளி ஆராய்ச்சியில் பல்வேறு அரிய சாதனைகளை படைத்து வருகிறது.
இதனுடன், வணிக ரீதியாகவும் வெளிநாட்டு செயற்கைக்கோள்களை விண்வெளியில் வைப்பதன் மூலம் உலக சந்தையில் முன்னணி நிறுவனமாக மாறியுள்ளது. இதற்கிடையில், எதிர்கால தேவைகளை மனதில் கொண்டு சந்திரயான்-4 மற்றும் ககன்யான் உள்ளிட்ட பல ஆராய்ச்சி திட்டங்களை இஸ்ரோ தீவிரமாக செயல்படுத்தி வருகிறது. இது தவிர இந்திய விண்வெளி ஆய்வு மையமான பாரதீய அந்தர்க்ஷா நிலையத்தையும் 2035-ம் ஆண்டுக்குள் விண்வெளிக்கு அனுப்பவும் இஸ்ரோ திட்டமிட்டுள்ளது.
அதற்கான ஆயத்த பணிகள் நடந்து வருகின்றன. அதன் ஒரு பகுதியாக தற்போது SPADEX திட்டம் (Space Docking Experiment) செயல்படுத்தப்பட்டு வருகிறது. இத்திட்டத்தின்படி, விண்வெளியில் விண்கலங்களை ஒருங்கிணைக்கும் ஆய்வுப் பணிகள் மேற்கொள்ளப்பட உள்ளன. இதற்காக, இஸ்ரோ வழிகாட்டுதலின்படி, தலா 400 கிலோ எடை கொண்ட, சேசர் மற்றும் டார்கெட் என்ற இரண்டு விண்கலங்கள், தனியார் நிறுவனத்தால் வடிவமைக்கப்பட்டுள்ளன. இந்த இரட்டை விண்கலங்கள் ஸ்ரீஹரிகோட்டாவில் உள்ள ஏவுதளத்தில் இருந்து பிஎஸ்எல்வி சி-60 ராக்கெட் மூலம் ஏவப்பட உள்ளன.
இந்த விண்கலங்கள் பூமியில் இருந்து சுமார் 700 கி.மீ தொலைவில் வெவ்வேறு சுற்றுப்பாதையில் நிலைநிறுத்தப்பட உள்ளது. அதன்பின், அவர்களை ஒருங்கிணைக்கும் பணி மேற்கொள்ளப்படும். தற்போது ராக்கெட் பாகங்களை ஒருங்கிணைத்து அதில் விண்கலத்தை நிறுவும் பணியில் விஞ்ஞானிகள் ஈடுபட்டுள்ளனர். திட்ட மறுஆய்வுக் குழுவின் ஒப்புதல் கிடைத்ததும் துவக்கப் பணிகள் முடுக்கிவிடப்படும் என்று தெரிவிக்கப்பட்டுள்ளது.
