சென்னையில் நடைபெற்ற விசிகா தலைவர் திருமாவளவனின் கார் விபத்து விவகாரம் அரசியல் பரபரப்பை ஏற்படுத்தியுள்ளது. உயர்நீதிமன்றம் அருகே நடந்த சம்பவத்தில் திருமாவளவனின் கார், வழக்கறிஞரின் பைக்குடன் மோதியதாக கூறப்படுகிறது. இதையடுத்து வழக்கறிஞரும், திருமாவளவனின் ஆதரவாளர்களும் வாக்குவாதத்தில் ஈடுபட்டனர்.
இந்த சம்பவம் குறித்து திருமாவளவன் தனது X பக்கத்தில், “இது தற்செயலான விபத்து அல்ல, ஆர்எஸ்எஸ் மற்றும் பாஜகவின் திட்டமிட்ட சதி” என்று குற்றம் சாட்டினார். அதற்குப் பின்னர் பலர் இதை அரசியல் நோக்கத்துடன் விளக்கினர்.
இதற்கு பதிலளித்த பாஜக மாநில தலைவர் நயினார் நாகேந்திரன், “திருமாவளவனின் ஆட்கள் தான் வழக்கறிஞரை தாக்கினர். அதற்கும் பாஜகவுக்கும் என்ன சம்பந்தம்? நாங்களே காரணம் என்றால், அவர் எங்கள் கூட்டணியில் சேர்ந்துவிட வேண்டியதுதானே!” என்று சாடினார்.
அதே சமயம், கமல்ஹாசன் உள்ளிட்ட பல அரசியல் தலைவர்கள் திருமாவளவனின் கோரிக்கையில் நியாயம் இருப்பதாகவும், உரிய விசாரணை நடத்தப்பட வேண்டும் என்றும் வலியுறுத்தியுள்ளனர். இந்த விவகாரம் தற்போது தமிழக அரசியல் வட்டாரங்களில் கடும் விவாதமாக மாறியுள்ளது.
