சென்னை: மார்ச் 5ஆம் தேதி தமிழ்நாடு முதல்வர் மு.க.ஸ்டாலின் தலைமையில் நாடாளுமன்ற தொகுதி மறு சீரமைப்பை எதிர்க்கக் கூடிய கூட்டம் நடைபெறுகிறது. இந்த கூட்டத்தில் கலந்து கொள்ளாதவர்கள் தமிழ்நாட்டின் நலனுக்கு எதிரானவர்கள் என்றும், தமிழ் இன துரோகிகள் என்றும் கூறியுள்ளார் கொங்குநாடு மக்கள் தேசிய கட்சியின் பொதுச் செயலாளர் ஈஸ்வரன்.
இவ்வாறு கூறிய ஈஸ்வரன், “மார்ச் 5ஆம் தேதி நடைபெற்றிருக்கும் கூட்டம் தமிழ்நாட்டின் உரிமைகளை உறுதிப்படுத்தும் கூட்டமாக உள்ளது. தமிழ்நாட்டின் வளர்ச்சி மற்றும் தமிழர்களின் எதிர்காலம் முக்கிய கொள்கை என்று கருதி அனைத்து கட்சித் தலைவர்களையும் அழைத்து, அவற்றின் கருத்துக்களை கேட்டுக்கொள்வது மிகவும் அவசியம். நாடாளுமன்ற தொகுதி மறு சீரமைப்பை மக்கள் தொகை அடிப்படையில் செய்யக்கூடாது என்பதே நமது நிலைப்பாடு. அதனை முன்வைத்து முதலமைச்சர் இந்த கூட்டத்தை கூட்டியிருக்கிறார்” என தெரிவித்துள்ளார்.
பின்பு அவர், “இந்த கூட்டத்தில் கலந்து கொள்ள தயாராகி வரும் மாற்று கருத்து உடையவர்கள், அரசியல் ரீதியாக எதிரணிக்கு தலைமை தாங்குபவர்களும், அவர்களுடன் சேர்ந்து இந்த கூட்டத்தில் தங்களின் கருத்துக்களை பகிர்ந்துகொள்ள இருக்கின்றனர். கடந்த தேர்தலில் பாஜகவுடன் கூட்டணியில் இருந்தவர்களும் இந்த கூட்டத்தின் முக்கியத்துவத்தை உணர்ந்து, அதை ஆதரித்து இசைவு தெரிவித்துள்ளனர். இருப்பினும், மக்கள் தொகை அடிப்படையில் தொகுதி சீரமைப்பு வேண்டாம் என்பதுதான் நமது உறுதியான நிலை” என்று கூறினார்.
இவர் மேலும், “தென் மாநிலங்களில் எவ்வாறு மக்கள் தொகையை கட்டுப்படுத்தி, நாட்டின் பொருளாதாரத்தை முன்னேற்ற உதவியுள்ளோம் என்பது அனைவரும் அறிந்த உண்மையென்றும், மக்கள் தொகையை பெருக்கி உள்ள வடமாநிலங்களுடன் ஒப்பிடும்போது, தென் மாநிலங்களின் செயல்பாடுகள் தான் இந்தியா உலக அரங்கில் முன்னேற உதவியுள்ளன என்றும் தெரிவித்துள்ளார்.
மக்கள் தொகை அடிப்படையில் தொகுதி மறு சீரமைப்பு செய்பவர்களின் முயற்சியை தடுக்க தமிழ்நாட்டின் அனைத்து அரசியல் கட்சிகளும், தமிழ் மக்களும் ஒன்றிணைந்து உரிமைக்குரல் எழுப்ப வேண்டும் என்றார்.
“இதில், அரசியல் பயிற்சி செய்யாமல், இதற்கு எதிரான அனைத்துக் கட்சி கூட்டத்தில் கலந்து கொள்ள மாட்டேன் என சொல்லும் அரசியல் தலைவர்களை தமிழ்நாட்டின் மக்கள் மன்னிக்க மாட்டார்கள். அவர்களால் நிகழ்ந்த இக்குற்றத்துக்குப் போதிய தண்டனை வழங்கப்படும்” என எச்சரிக்கை விடுத்தார்.
