ஆயத்த ஆடை ஏற்றுமதி மேம்பாட்டுக் கழகம் (ஏஇபிசி) வெளியிட்டுள்ள தகவலின்படி, நடப்பு நிதியாண்டின் இறுதிக்குள் திருப்பூர் பின்னலாடை ஏற்றுமதி ரூ.40 ஆயிரம் கோடியை எட்டும் எனத் தெரிவிக்கப்பட்டுள்ளது.
ஏஇபிசி துணைத் தலைவர் ஏ.சக்திவேல் வெளியிட்டுள்ள அறிக்கையில், திருப்பூர் பின்னலாடை ஏற்றுமதி எதிர்பார்த்ததை விட அதிகமாக வளர்ச்சி பெற்று வருகின்றது. ஜனவரி 2025 மாதத்தில் ஏற்றுமதி கடந்த ஆண்டை விட 12 சதவீதம் அதிகரித்து, 1,606 மில்லியன் அமெரிக்க டாலரை எட்டியுள்ளது.
கடந்த 10 மாதங்களை ஒப்பிடுகையில், ஒட்டுமொத்த ஏற்றுமதி வளர்ச்சி 12 சதவீதம் அதிகரித்துள்ளது. கடந்த ஆண்டு 11,583 மில்லியன் அமெரிக்க டாலராக இருந்த ஏற்றுமதி இப்போது 12,923 மில்லியன் டாலராக உயர்ந்துள்ளது. இந்த வளர்ச்சி தொடர்ந்து நிலைப்பேற்று வளரும் என எதிர்பார்க்கப்படுகிறது.
இந்த நிதியாண்டின் 10 மாதங்களின் ஏற்றுமதி கடந்த ஆண்டின் மொத்த ஏற்றுமதியை சமன் செய்துவிட்டதாகவும், இந்த வளர்ச்சி திருப்பூரின் நிலைத்தன்மையையும், தொழில்துறையின் முன்னேற்றத்தையும் உறுதிப்படுத்துவதாகவும் கூறப்பட்டுள்ளது.
பாரத் டெக்ஸ் 2025 என்ற விழாவில் திருப்பூரின் பங்கேற்பு வலுவாக இருந்ததாகவும், இது மேலும் அதிக ஆர்டர்களை பெற்றுத் தரும் எனவும் ஏஇபிசி அறிக்கையில் குறிப்பிடப்பட்டுள்ளது. வர்த்தகர்கள் திருப்பூரை ஏற்றுமதிக்கான முக்கிய மையமாக ஏற்கும் நிலை உருவாகி வருவதாகவும், இனி வரும் காலங்களில் பின்னலாடை ஏற்றுமதி மேலும் வளர்ச்சி பெறும் எனவும் தெரிவிக்கப்பட்டுள்ளது.
