கள்ளக்குறிச்சி: கள்ளக்குறிச்சி மாவட்டம் உளுந்தூர்பேட்டையை அடுத்த கூவாகம் கிராமத்தில் உள்ள புகழ்பெற்ற கூத்தாண்டவர் கோவிலில் சித்திரை திருவிழா ஆண்டுதோறும் 18 நாட்கள் கொண்டாடப்படுகிறது. இதில், பல்வேறு இடங்களில் இருந்து திருநங்கைகள் கூத்தாண்டவரை மணமகனாக ஏற்றுக்கொண்டு திருமணம் செய்து கொள்ள ஏராளமானோர் வருகிறார்கள். அதன்படி, கூவாகம் கூத்தாண்டவர் கோவிலில் சித்திரை திருவிழா ஏப்ரல் 19-ம் தேதி தொடங்கியது.
கூவாகத்தைச் சுற்றியுள்ள 8 கிராமங்களைச் சேர்ந்த மக்கள் கூழ் தயாரித்து கோவிலில் ஊற்றி பக்தர்களுக்கு வழங்கினர். தினமும் பல்வேறு நிகழ்ச்சிகள் நடைபெற்றன. முக்கிய நிகழ்வான கூத்தாண்டவரின் கண் திறப்பு நேற்று மாலை நடைபெற்றது. இந்த நிகழ்வில் பங்கேற்க நேற்று மதியம் முதல் தமிழ்நாடு மட்டுமின்றி பிற மாநிலங்கள் மற்றும் வெளிநாடுகளில் இருந்தும் ஏராளமான திருநங்கைகள் கூவாகத்தில் குவியத் தொடங்கினர். திருநங்கைகள், பட்டுச் சேலைகள் உடுத்தி, பூக்களால் அலங்கரிக்கப்பட்டு, மணப்பெண் வேடத்தில் கோயிலுக்கு வந்தனர். அவர்கள் மஞ்சள் நூலால் தாலியை கட்டி கோயில் பூசாரியிடம் கொடுத்தனர், கூத்தாண்டவரை தன் கணவராக பாவித்து தாலியை கட்டிக்கொண்டனர்.
பின்னர், அவர்கள் கோயிலிலிருந்து வெளியே வந்து நடனமாடி மகிழ்ந்தனர். கள்ளக்குறிச்சி மாவட்ட நிர்வாகம் திருவிழாவிற்கான குடிநீர், குளியலறைகள், கழிப்பறைகள் மற்றும் தங்குமிடங்களுக்கான ஏற்பாடுகளைச் செய்திருந்தது. பாலியல் துஷ்பிரயோகம் தடுப்பு குறித்த விழிப்புணர்வு மண்டபம் சமூக நலத்துறையால் அமைக்கப்பட்டிருந்தது. விழுப்புரம், உளுந்தூர்பேட்டையில் இருந்து சிறப்பு பேருந்துகள் இயக்கப்பட்டன. கள்ளக்குறிச்சி எஸ்பி தலைமையில் போலீசார் பாதுகாப்பு பணியில் ஈடுபட்டனர்.
கூத்தாண்டவரின் திருமண விழா நேற்று மாலை முதல் இரவு வரை கோயில் வளாகத்தில் தொடர்ந்தது. இன்று சித்திரை தேர் ஊர்வலம், அரவான் களப்பலி விழா, திருநங்கைகளின் தொடர்ந்து தாலி அறுத்து திருநங்கைகள் அழுகளம் காணும் நிகழ்ச்சிகள் நடைபெறுகின்றன. நாளை பிரியாவிடை விழா நடைபெறும். 18 நாள் சித்திரை திருவிழா 16-ம் தேதி தருமருக்கு முடிசூட்டு விழாவுடன் நிறைவடையும். ஏற்பாடுகளை இந்து சமய மற்றும் அறநிலையத் துறை அதிகாரிகள், கிராம மக்கள் மற்றும் விழாக் குழுவினர் செய்துள்ளனர்.
