மதுரையில் நடைபெற்ற திமுக மாணவரணி ஆர்ப்பாட்டத்தில், எம்.பி. திருச்சி சிவா மத்திய அரசை கடுமையாக விமர்சித்தார். தமிழர்களின் தொன்மையை சாட்சியாகக் கூறும் கீழடி தொல்லியல் ஆய்வறிக்கையை மத்திய அரசு ஏற்க மறைப்பது நியாயமல்ல என அவர் தெரிவித்துள்ளார். “நீ யார் எங்களின் வரலாற்றை மறைப்பதற்கு?” என்ற கேள்வியுடன் அவர் தனது கோபத்தையும் நியாயத்தையும் வெளிப்படுத்தினார்.
இந்த ஆர்ப்பாட்டம் மதுரை விரகனூர் பகுதியில் இன்று நடைபெற்றது. இதில் திமுக மாணவரணி உள்ளிட்ட கூட்டணி கட்சிகளின் பலர் கலந்துகொண்டனர். திருச்சி சிவா பேசுகையில், சிந்துவெளி நாகரிகம் இந்தியாவின் பழமையான நாகரிகமாகக் கருதப்படுகிறது என்றாலும், கீழடி அகழாய்வு அதன் முன்னதாகவே தமிழர்கள் நாகரிகம் வலுவாக இருந்ததைக் காட்டுகிறது என்றார்.
கீழடி நாகரிகம் கிறிஸ்துவுக்கு 600 ஆண்டுகளுக்கு முன்பே இருந்தது என ஆய்வுகள் நிரூபிக்கின்றன என்றும், இதனை அறிவியல் ரீதியாக ஏற்க மத்திய அரசு தயக்கம் காட்டுகிறது எனவும் தெரிவித்தார். அதேசமயம், சரஸ்வதி நாகரிகத்தை புதுப்பிக்கவே 2000 கோடி ரூபாய் ஒதுக்கப்படும் நிலையில், கீழடியைப் புறக்கணிப்பது ஏன் என்ற கேள்வி எழுப்பினார்.
அதே நேரத்தில், இந்திய மற்றும் வெளிநாட்டு ஆய்வகங்கள் கீழடியில் கண்டுபிடிக்கப்பட்ட பொருட்களை ஆய்வு செய்து அதன் தொன்மையை உறுதிசெய்துள்ளன என்றார். அமர்நாத் ராமகிருஷ்ணா தலைமையில் நடைபெற்ற இந்த அகழாய்வின் முடிவுகள் ஏற்கனவே மத்திய அரசிடம் அனுப்பப்பட்டு இரண்டாண்டுகள் ஆகியும் பதிலளிக்கப்படவில்லை என்று குற்றம்சாட்டினார்.
அமர்நாத் ராமகிருஷ்ணனின் பணியிட மாற்றம் திட்டமிட்டதொரு நடவடிக்கையாகவே தெரிகிறது என்றும், இதனைப் பாதுகாக்க தமிழக அரசு, மக்கள், மற்றும் எதிர்க்கட்சிகள் ஒன்றாக குரல் கொடுக்க வேண்டும் என்றும் வலியுறுத்தினார்.
தமிழ் உலகின் முதன்மையான பழமையான மொழி என்பதையும், கீழடி அதன் பரம்பரையின் ஆதாரமான சான்று என்பதையும் அவர் வலியுறுத்தினார். இந்த விவகாரத்தை நாடாளுமன்றத்தில் மிக கடுமையாக எடுத்துக்கொள்ளப் போவதாகவும், கீழடி அறிக்கையை ஏற்க மத்திய அரசு தயங்கினால், நாடாளுமன்றம் செயல்பட முடியாத நிலைக்குத் தாங்கள் கொண்டு செல்வோம் என்றும் எச்சரிக்கை விடுத்தார்.
இதனை ஒரு பண்பாட்டு போராகவும், கலாச்சாரப்படையெடுப்பாகவும் அவர் விவரித்தார். திமுக மட்டுமல்ல, எதிர்க்கட்சிகள் அனைத்தும் இந்த விவகாரத்தில் ஒன்றிணைந்து கிளர்ச்சி ஏற்படுத்த வேண்டும் என்றும், தமிழர்களின் வரலாற்று மரபை அழிக்க முயல்பவர்களுக்கு பதிலடி கொடுக்க வேண்டும் என்றும் திருச்சி சிவா தனது உரையில் வலியுறுத்தினார்.
