சுதந்திரப் போராட்ட வீராங்கனை அஞ்சலை அம்மாளின் நினைவு தினத்தை ஒட்டி, தவெக தலைவர் விஜய், பனையூரில் அமைந்துள்ள கட்சியின் தலைமையகத்தில் அவரது சிலைக்கு மாலை அணிவித்து மரியாதை செலுத்தினார்.
இந்த நிகழ்வின் போது, அவர் மகளிர் பாதுகாப்பு தொடர்பாக சமூக ஊடகத்தில் கருத்து வெளியிட்டுள்ளார். “நாட்டு விடுதலைக்காகவும், மக்களின் வாழ்வாதாரத்துக்காகவும் போராடிய அஞ்சலை அம்மாளின் நினைவு நாளில், பெண்களின் உரிமைகள் மற்றும் பாதுகாப்பை உறுதி செய்யத் தவெக உறுதி எடுக்கிறது” என அவர் தெரிவித்தார்.
பாமக தலைவர் அன்புமணி ராமதாஸ், அஞ்சலை அம்மாளின் தியாகத்தையும் வீரத்தையும் வணங்கினார். இந்திய விடுதலைப் போராட்டத்தில் அவருடைய பங்களிப்பு மறக்க முடியாதது என்று அவர் தெரிவித்தார்.
பாமக நிறுவனர் ராமதாஸ், அஞ்சலை அம்மாள் தென்னிந்தியாவின் “ஜான்சி ராணி” என்று மகாத்மா காந்தியால் போற்றப்பட்டவர் என்றும், 1921-ம் ஆண்டு ஒத்துழையாமை இயக்கத்தில் பங்கேற்ற தென்னிந்தியாவின் முதல் பெண்மணி என்றும் குறிப்பிட்டார். கர்ப்பிணியாகவும், குழந்தையுடன் சிறை சென்ற அஞ்சலை அம்மாளின் தியாகம் எதிர்காலத்துக்கு வழிகாட்டும் வகையில் இருக்க வேண்டும் என்றார்.
அவருக்கு தமிழக அரசு நினைவு மண்டபம் அமைக்க வேண்டும் எனவும், மகளிரின் பாதுகாப்பு, உரிமைகள் உறுதி செய்யப்பட வேண்டும் என்றும் பாமக தலைவர்கள் வலியுறுத்தியுள்ளனர்.
