மத்திய அரசு மக்கள்தொகை அடிப்படையிலான மக்களவைத் தொகுதி மறுசீரமைப்பை 25 ஆண்டுகள் வரை ஒத்திவைக்க வேண்டும் எனவும், தமிழகத்தில் உடனடியாக சாதிவாரி கணக்கெடுப்பு நடத்தப்பட வேண்டும் என பாமக தலைவர் அன்புமணி ராமதாஸ் வலியுறுத்தியுள்ளார். அவரது அறிக்கையில், 2027 ஆம் ஆண்டில் தேசிய அளவில் சாதிவாரி கணக்கெடுப்பு நடக்கும் என்ற மத்திய அரசின் அறிவிப்பு தென்னக மக்களில் குழப்பத்தை ஏற்படுத்தியுள்ளது என கூறினார்.
2025இல் சாதிவாரி கணக்கெடுப்பு நடக்க வேண்டும் என்ற பாமக கோரிக்கையை மத்திய அரசு ஏற்கவில்லை. இதனால் 2026இல் நடைபெறும் மக்கள்தொகை கணக்கெடுப்பு அடிப்படையில் தொகுதி மறுசீரமைப்பு நடை பெறும் அபாயம் உள்ளது. தமிழ்நாடு போன்ற மாநிலங்கள், மக்கள்தொகையை கட்டுப்படுத்தியதால், தொகுதி எண்ணிக்கை குறையும் என அஞ்சப்படுகிறது.
இதை தவிர்க்க, நாடு முழுவதும் தொகுதிகள் எவ்வளவு உயர்த்தப்படுகிறதோ, அதே அளவுக்கு தமிழ்நாட்டிலும் உயர்த்தப்பட வேண்டும். இது நடக்கவில்லை என்றால், தற்போது உள்ள நிலையே தொடர வேண்டும். இல்லை என்றால், 2025இல் கணக்கெடுப்பு நடத்தி, 2035 வரை மறுசீரமைப்பை ஒத்திவைக்க வேண்டும்.
மேலும், 69% இடஒதுக்கீட்டுக்கு எதிரான வழக்குகள் உச்சநீதிமன்றத்தில் இருப்பதால், சாதிவாரி கணக்கெடுப்பு அவசியமாகிறது. இந்த விவரங்கள் இல்லாமல் சமூகநீதியை பாதுகாக்க முடியாது. தேசிய கணக்கெடுப்பு மட்டும் போதாது, மாநில அளவிலும் விரிவான தரவுகள் தேவைப்படுகின்றன.
எனவே, தமிழக அரசு, 2008 புள்ளிவிவரச் சட்டத்தின் கீழ் தனிநிலை சாதிவாரி கணக்கெடுப்பை உடனடியாக அறிவிக்க வேண்டும். இது மட்டுமே தமிழகத்தில் இட ஒதுக்கீட்டை பாதுகாக்கும் வழி என்றும், மக்களின் அச்சத்தை போக்கும் உத்தரவை மத்திய அரசு வழங்க வேண்டும் என்றும் அன்புமணி வலியுறுத்தியுள்ளார்.
