நடிகர் விஜய்யின் தமிழக வெற்றிக் கழகத்தின் தொண்டர்கள் எதிர்பார்த்துள்ள நிகழ்வுகள் விரைவில் நடக்கப்போகின்றன. விஜய் கடந்த பிப்ரவரி மாதம் தனது அரசியல் கட்சியை தொடங்கிய நிலையில், தேர்தல் ஆணையத்திலும் கட்சி பதிவு செய்யப்பட்டுள்ளது. ஆனால் கட்சியின் சின்னம் மற்றும் கொடி இன்னும் அறிமுகப்படுத்தப்படவில்லை.
இதற்கிடையில், தமிழக வெற்றிக் கழகத்தின் மாநாடு செப்டம்பர் 25ஆம் தேதி திருச்சியில் நடைபெறவுள்ளது. திருச்சியில் உள்ள பொன்மலை ஜி கார்னர் திடலில் இந்த மாநாடு நடைபெறும் என கூறப்படுகிறது. அந்த திடலை பயன்படுத்த அனுமதிக்கோரி, திருச்சி ரயில்வே கோட்ட மேலாளரிடம் கடிதம் அளிக்கப்பட்டுள்ளது.
தமிழக வெற்றிக் கழகத்தின் கொடிகள் நீலம் மற்றும் வெள்ளை நிறத்தில் வடிவமைக்கப்பட்டு தயார் நிலையில் உள்ளன. மூன்று வகையான கொடிகள் வடிவமைக்கப்பட்டு, எது பயன்படுத்தப்படும் என்பது பற்றி விஜய்யே இறுதியாக முடிவெடுப்பார் என தகவல் வெளியாகியுள்ளது. மேலும், கட்சியின் நிர்வாகப் பொறுப்புகள் மற்றும் பதவிகள் குறித்த அறிவிப்புகள் மாநாட்டில் வழங்கப்படும் என கூறப்படுகிறது.
விஜய்யின் புதிய திரைப்படமான ‘கோட்’ செப்டம்பர் 5 ஆம் தேதி வெளியிடப்படுவதன் பின்னர், த.வெ.க. தொடர்பான மேலதிக தகவல்கள் வெளியாகும் என எதிர்பார்க்கப்படுகிறது.
