சென்னை: வீடு என்பதை மிகவும் ரசித்து ரசித்து கட்டுவதன் நோக்கம் அது இருப்பிடம் என்பதால் மட்டுமல்ல. வெறும் இருப்பிடத்தை அமைக்க நாம் இவ்வளவு சிரமப்பட வேண்டிய அவசியமல்ல. இனிமையான இல்லத்தை அமைப்பது ஒரு கலை, ஒரு தவம்; மனதுக்கு நிறைவு தரும் ஒரு சுகமான பணி.
வீடு என்பது நம்மை, நமது ரசனையை, நமது விருப்பத்தை நம்மைச் சார்ந்தவர்களிடம் மவுனமாக எடுத்துச் சொல்லிக் கொண்டேயிருக்கும். அதனால்தான் வீடு கட்டுவதில் நாம் நமது அறிவையும் அனுபவத்தையும் முழுமையாகப் பயன்படுத்த விரும்புகிறோம்.
வீட்டின் எந்த அறை நமக்கு முக்கியமானது. அதுதான் நமது வீட்டின் வரவேற்பறை. அன்போடும். அக்கறையோடும் நம் வீட்டுக்கு வரும் விருந்தினரை உற்சாகமாக வரவேற்கும் நாம் அவரை ஆசுவாசப்படுத்த வேண்டி அமரவைக்கும் அறைதான் வரவேற்பறை.
வீட்டுக்கு வரும் அனைத்து நண்பர்களையும் உவகையுடன் வரவேற்கும் அறை நமது வரவேற்பறை. அதை நாம் எப்படி வைத்திருக்க வேண்டும் என்பதில் நாம் சிறிது அக்கறை எடுத்துக்கொள்வது நல்லது.
வரவேற்பறையின் சுவர்களின் நிறம் மனதுக்கு உகந்ததாக இருக்க வேண்டும். வீட்டுக்குள் நுழையும் நண்பர்களின் மனத்தில் ஆரோக்கிய அதிர்வுகளை உருவாக்கும் வகையிலான நிறத்தைத் தேர்ந்தெடுக்க வேண்டும்.
முரட்டுத்தனமாக ரசனை கொண்டவர்களாக இருப்பவர்கள்கூட வீட்டின் வரவேற்பறை விஷயத்தில் சிறிது மெல்லிய ரசனைக்காரர்களாக மாறிவிட வேண்டும். வரவேற்பறையின் அமைப்பையும் சுத்தத்தையும் பார்த்த உடன் விருந்தினர்களின் மனது ஆனந்த ஊஞ்சலில் ஆட வேண்டும்.
வாழ்வை மேம்படுத்தும் நல்ல பொன்மொழிகளையோ நல்லறிஞர்களின் ஓவியத்தையோ உருவப் படத்தையோ வரவேற்பறையில் அமைக்கலாம். நமது உரையாடலின் போது இயல்பாக அவர்கள் கண்ணில் படும் இந்த ஓவியமோ பொன்மொழியோ சட்டென அவர்களை ஈர்த்துவிடும்.
வரவேற்பறையில் போதுமான காற்றும், வெளிச்சமும் எப்போதும் இருக்கும் படியாக சூழல் அமைந்திருக்க வேண்டும். அதிக வெளிச்சமோ அதிக இருட்டோ இருக்கக் கூடாது.
வரவேற்பறையின் சோபாக்களும், நாற்காலிகளும் எப்போதும் சுத்தமாக இருக்க வேண்டும். டீப்பாய்கள் மீது நாம் வைத்திருக்கும் பத்திரிகைகளும் இதழ்களும் மிக நாசூக்காக அடுக்கி வைக்கப்பட்டிருக்க வேண்டும். வரவேற்பறையின் அழகே நம் வீட்டின் அழகைச் சொல்லாமல் சொல்லும் என்பதை மறந்துவிடக் கூடாது.
