சென்னை: தங்கம் விலை தொடர்ந்து அதிகரித்து வரும் நிலையில், இன்று (செப் 22) சென்னையில் 22 காரட் ஆபரண தங்கத்தின் விலை சவரனுக்கு ரூ.560 உயர்ந்துள்ளது. இதனால், ஒரு சவரன் ரூ.82,880க்கு விற்பனை செய்யப்படுகிறது. கிராமுக்கு ரூ.70 அதிகரித்து ரூ.10,360க்கு விற்பனை ஆகி வருகிறது. இந்த உயர்வு நகை விரும்பிகளுக்கும், முதலீட்டாளர்களுக்கும் அதிர்ச்சியையும் கவலையையும் ஏற்படுத்தியுள்ளது.
கடந்த சில நாட்களாக தங்கம் விலை நிலையான உயர்வை பதிவு செய்து வருகிறது. செப்டம்பர் 20 அன்று மட்டும் ஒரு கிராம் தங்கம் ரூ.60 உயர்ந்தது. அதன்படி ஒரு சவரன் ரூ.480 உயர்ந்து ரூ.82,320க்கு விற்பனையானது. செப்டம்பர் 21 அன்று விடுமுறை தினமாக இருந்ததால் விலையில் மாற்றமில்லை. ஆனால் இன்று ஏற்பட்ட உயர்வால், தங்கம் விலை புதிய உச்சத்தை தொட்டுள்ளது.
ஒரு சவரன் தங்கம் ரூ.83 ஆயிரத்தை நெருங்கியுள்ளதால், வருங்காலத்தில் இன்னும் அதிகரிக்குமா என்ற கேள்வி எழுந்துள்ளது. பொருளாதார நிலைமைகள், சர்வதேச சந்தை ஏற்றத்தாழ்வுகள், அமெரிக்க டாலர் மதிப்பு ஆகியவை தங்கம் விலையை பாதிக்கின்றன. இதனால், தங்கத்தில் முதலீடு செய்ய நினைப்போர் குழப்பத்தில் உள்ளனர்.
தங்கம் பாரம்பரியமாக பாதுகாப்பான முதலீடு என கருதப்பட்டாலும், விலை அதிகரிப்பால் சாதாரண மக்கள் நகை வாங்குவதில் சிரமம் அனுபவிக்கின்றனர். திருமணங்கள், விழாக்கள் போன்ற நிகழ்ச்சிகளுக்கு தங்கம் அவசியமாக கருதப்படுவதால், விலை உயர்வு குடும்பங்களின் செலவினங்களில் கூடுதல் சுமையை ஏற்படுத்துகிறது. இந்நிலையில், தங்கத்தின் விலை இன்னும் எவ்வாறு மாறும் என்பது சந்தை கவனத்தை ஈர்த்துள்ளது.
