மாருதி சுஸுகி நிறுவனம் தனது வாடிக்கையாளர்களுக்கு பெரிய நற்செய்தியை அறிவித்துள்ளது. சமீபத்தில் ஜிஎஸ்டி கவுன்சில் எடுத்த தீர்மானத்தின் படி, சிறிய கார்களுக்கான வரி 28% இலிருந்து 18% ஆகக் குறைக்கப்பட்டதோடு, 1% செஸ் வரியும் நீக்கப்பட்டது. இந்த மாற்றத்தின் முழுப் பலனும் வாடிக்கையாளர்களுக்கு வழங்கப்படும் என நிறுவனம் அறிவித்துள்ளது.
இந்த வரி குறைப்பின் விளைவாக, மாருதி சுஸுகியின் எண்ட்ரி-லெவல் மாடல்களின் எக்ஸ்-ஷோரூம் விலை ரூ.1.29 லட்சம் வரை குறையவுள்ளது. பண்டிகை கால சலுகையை முன்னிட்டு, இன்று முதல் புதிய விலை அமலுக்கு வந்துவிட்டது. குறிப்பாக sub-4 metre பிரிவிலுள்ள பிரபலமான மாடல்கள் அனைத்தும் அதிகமாக பயன்பெற உள்ளன.
மாருதி சுஸுகி நிர்வாகிகள், விலை குறைப்புக்கான விவரங்களை விரைவில் மாடல் வாரியாக அறிவிப்பதாக தெரிவித்துள்ளனர். இதனால், புதிய கார் வாங்க திட்டமிடுவோர் மற்றும் பண்டிகைக்காலத்தில் புக்கிங் செய்வோர் அதிக அளவில் ஈர்க்கப்படுவார்கள் என எதிர்பார்க்கப்படுகிறது.
மேலும், மத்திய மறைமுக வரிகள் மற்றும் சுங்க வாரியம் (CBIC) வெளியிட்ட விளக்கத்தில், இனி தள்ளுபடி விலையில் விற்பனை செய்யப்படும் பொருட்களுக்கு அந்த தள்ளுபடி விலைக்கே ஜிஎஸ்டி விதிக்கப்படும் என்று தெளிவுபடுத்தியுள்ளது. இதன் மூலம் வாடிக்கையாளர்களுக்கும் டீலர்களுக்கும் கூடுதல் நன்மை கிடைக்கிறது.
