புதுடில்லி: முக்கிய வர்த்தக கூட்டு நாடுகளுக்கு அமெரிக்கா விதித்துள்ள வரிகளின் எதிரொலியால், சீன பொருட்களின் இறக்குமதி மீது மத்திய அரசு கண்காணிப்பை கடுமையாக்கியுள்ளது. இந்த உறுதியான உத்தி வகுக்க வர்த்தக செயலர் தலைமையில் ஆலோசனை கூட்டங்கள் நடைபெற்றன.
சமீபத்தில், அமெரிக்க அதிபர் டோனால்ட் டிரம்ப் புதிய பரஸ்பர வரிகளை விதிக்கும் உத்தரவில் கையெழுத்திட்டார். இதன் மூலம், பல நாடுகளில் இருந்து அமெரிக்காவுக்கு இறக்குமதியாகும் பொருட்களுக்கு 10 முதல் 50 சதவீதம் வரை கூடுதல் மதிப்பு வரிகள் விதிக்கப்பட்டன. அதில் 34 சதவீதம் என்ற அதிக வரி விதிப்பால், சீனா கடுமையாக பாதிக்கப்பட்டுள்ளது.
இதன் மூலம், அமெரிக்காவுக்கான சீன இறக்குமதிகள் மீது ஏற்கனவே இருந்த 20 சதவீத வரியுடன் சேர்ந்து மொத்த வரி 54 சதவீதமாக உயர்ந்துள்ளது. இந்த வரி விதிப்பால், சீனா தன் ஏற்றுமதிகளை வேறு நாடுகளுக்கு திருப்பி விடக்கூடும் என்ற கவலை எழுந்துள்ளது. குறிப்பாக, இது இந்தியாவில் பொருள் குவிப்புக்கு வழி வகுக்கும் என்ற அச்சத்தை ஏற்படுத்தியுள்ளது.
வர்த்தகத் துறை தரவுகளின்படி, 2024 – 25ம் நிதியாண்டின் ஏப்ரல் – பிப்ரவரி காலகட்டத்தில், சீனாவில் இருந்து இந்தியா 8.92 லட்சம் கோடி ரூபாய் மதிப்புள்ள பொருட்களை இறக்குமதி செய்துள்ளது. இது முந்தைய ஆண்டை விட 10.40 சதவீதம் அதிகமாகும். இதன் பின்விளைவாக, சீனாவுக்கான இந்திய ஏற்றுமதி 15.70 சதவீதம் குறைந்து 1.09 லட்சம் கோடி ரூபாயாக இருந்துள்ளது.
இந்த நிலவரத்தை கவனத்தில் கொண்டு, வர்த்தக தீர்வுகள் இயக்குனரகம், சைனிஸ் பொருட்களின் குவிப்பை தடுக்க வலுவான தடுப்பு நடவடிக்கைகளை உறுதி செய்ய முயற்சித்து வருகிறது. மேலும், பொருள் குவிப்பை தடுப்பதற்கான உத்திகளை வகுக்கவும் ஆலோசனைகள் நடந்து வருகின்றன.
