நீண்ட காலமாக பயன்படுத்தாமல் இருக்கும் கிரெடிட் கார்டை மூட வேண்டும் என்று பலர் யோசிப்பார்கள். ஆனால், இதனால் உங்கள் கிரெடிட் ஸ்கோரில் சில எதிர்மறையான விளைவுகள் ஏற்படக்கூடும். குறிப்பாக, உங்களுக்கு வழங்கப்பட்ட கடன் வரம்பு குறைவதால், பயனீட்டு விகிதம் அதிகரிக்கும் அபாயம் உள்ளது. இது உங்களை அதிக ஆபத்தான கடன் வாங்குபவராக காட்டி, எதிர்காலத்தில் கடன் பெறுவதற்கு சிக்கல்களை உண்டாக்கலாம்.
மேலும், பழைய கணக்குகளை மூடுவது உங்கள் கடன் வரலாற்றின் நீளத்தை குறைக்கும். நீண்ட கால கடன் வரலாறு நல்ல நம்பகத்தன்மையை உருவாக்கும். ஆனால் பழைய கார்டுகளை மூடினால், அது குறைவாகி, நீங்கள் புதிதாக கடன் வாங்குபவராக கருதப்படலாம். இது உங்கள் கிரெடிட் சுயவிவரத்தில் எதிர்மறை தாக்கத்தை ஏற்படுத்தும்.
அதே சமயம், கிரெடிட் கார்டு, ஹோம் லோன், கார் லோன் போன்ற பல்வேறு கடன் வகைகளில் சமநிலையை பராமரிப்பதும் முக்கியம். ஒரு கார்டை மூடுவதால் அந்த சமநிலை சீர்குலையக்கூடும். எனவே குறைந்தபட்சம் ஒரு அல்லது இரண்டு கார்டுகளை வைத்திருப்பது நன்மையாகும். ஆயினும், அதிக கட்டணங்கள் வசூலிக்கும் அல்லது உங்களுக்கு பயன்பாடில்லாத கார்டுகளை மூடுவது சரியான முடிவாக இருக்கும்.
கிரெடிட் கார்டை மூடுவதற்கு முன், நிலுவையில் உள்ள தொகைகளை முழுமையாக செலுத்துவது அவசியம். மிகவும் பழமையான கார்டுகளை மூடாமல் வைத்திருப்பது நல்லது. மேலும், வழங்குனரிடம் எழுத்துப்பூர்வமாக தகவல் கொடுத்து, கணக்கு முறையாக மூடப்பட்டதா என்பதை உறுதி செய்ய வேண்டும். இவ்வாறு கவனமாக நடந்து கொண்டால், கிரெடிட் ஸ்கோரில் ஏற்படும் சேதத்தை குறைக்கலாம்.
