பீஜிங்: அமெரிக்கா சீனாவுக்கு எதிராக 100 சதவீத வரி விதித்தது உலக வர்த்தகத்தில் அதிர்வலைகளை ஏற்படுத்தியுள்ளது. அதிபர் டிரம்ப் இரண்டாவது முறையாக பதவியேற்ற பிறகு எடுத்துள்ள இந்த முடிவு சீன பொருளாதாரத்தை பெரிதும் பாதிக்கக்கூடும் என நிபுணர்கள் எச்சரிக்கின்றனர். சீன வெளியுறவுத்துறை அமைச்சகம் இதற்கு கடும் எதிர்ப்பு தெரிவித்து, “அமெரிக்காவின் இரட்டை நிலை கொள்கை ஏற்றுக்கொள்ள முடியாது. நாங்கள் போராட விரும்பவில்லை, ஆனால் தேவையெனில் தயார்” என தெரிவித்துள்ளது.
அமெரிக்காவின் புதிய வரி விதிப்பினால் சீனப் பொருட்களுக்கு மொத்தமாக 130 சதவீத வரி விதிக்கப்படுகிறது. இதனால் மின்னணு பொருட்கள், கார்கள், மற்றும் உற்பத்தி பொருட்களின் விலை உயர்வது தவிர்க்க முடியாது என பொருளாதார வல்லுநர்கள் கூறுகின்றனர். சீன அதிகாரிகள் இது இருதரப்பு பேச்சுவார்த்தை சூழ்நிலையை பாதிக்கும் என்றும், தங்கள் சட்டபூர்வ உரிமைகளைப் பாதுகாக்க அனைத்து நடவடிக்கைகளையும் எடுப்போம் என்றும் வலியுறுத்தினர்.
இந்த வர்த்தக மோதல் மேலும் தீவிரமடையக்கூடும் என சர்வதேச வட்டாரங்கள் கணிக்கின்றன. வரவிருக்கும் ஆசியா-பசிபிக் பொருளாதார ஒத்துழைப்பு மாநாட்டில் டிரம்ப் மற்றும் ஷீ ஜின்பிங் சந்திக்க இருப்பதாக இருந்தது. ஆனால் தற்போதைய நிலைமை காரணமாக அந்த சந்திப்பு நடைபெறாது என டிரம்ப் தெரிவித்துள்ளார். இது இருநாடுகளுக்கிடையேயான பொருளாதார உறவுகளில் பெரும் பதற்றத்தை உருவாக்கியுள்ளது.
சீனா தனது நலன்களைப் பாதுகாக்க எந்த விலைக்கும் தயங்காது என வலியுறுத்தி வருகிறது. உலக வர்த்தகத்தில் இத்தகைய கடும் நடவடிக்கைகள் உலக பொருளாதாரத்தையே பாதிக்கும் அபாயம் உள்ளது. பொருளாதார நிபுணர்கள் இரு நாடுகளும் பேச்சுவார்த்தை வழியில் தீர்வைத் தேட வேண்டியது அவசியம் எனவும், இப்போர் உலக சந்தைக்கு பெரிய சவாலாக மாறும் எனவும் எச்சரிக்கின்றனர்.
