வாஷிங்டன் நகரில் அமெரிக்க அதிபர் டிரம்ப், சீன அதிபருடன் நடந்த பேச்சுவார்த்தைக்குப் பிறகு முக்கிய அறிவிப்பை வெளியிட்டார். சீனாவின் பைட்டான்ஸ் நிறுவனத்துக்குச் சொந்தமான டிக்டாக் செயலி இனி அமெரிக்க கட்டுப்பாட்டின் கீழ் இயங்கும் என அவர் தெரிவித்துள்ளார். அமெரிக்கர்களிடையே பரவலாகப் பயன்படுத்தப்படும் இந்த தளத்தின் தரவுகள் சீன அரசின் கைகளில் செல்லக்கூடும் என்ற அச்சம் காரணமாகவே இந்த மாற்றம் ஏற்பட்டுள்ளது. டிசம்பருக்குள் தீர்வு காணப்படாவிட்டால் டிக்டாக் தடை செய்யப்படும் என டிரம்ப் எச்சரித்திருந்தார்.
டிக்டாக்கின் அமெரிக்க வர்த்தகம் குறித்த பேச்சுவார்த்தைகள் பல மாதங்களாக நடந்தன. அதன் பயனாக சீன அதிபர் ஒப்பந்தத்தில் கையெழுத்திட்டதாக அறிவிக்கப்பட்டது. செய்தியாளர் சந்திப்பில் டிரம்ப், இந்த ஒப்பந்தம் அமெரிக்க முதலீட்டாளர்களின் கட்டுப்பாட்டில் கொள்கைகள் உருவாக உதவும் எனவும், பயனர்களின் பாதுகாப்பு உறுதி செய்யப்படும் எனவும் தெரிவித்தார்.
துணை அதிபர் ஜே.டி. வான்ஸ் கூறுகையில், இந்த ஒப்பந்தம் வெளிநாட்டு அரசுகள் செயலியை பிரசார கருவியாக மாற்றுவதைத் தடுக்கிறது எனவும், அமெரிக்கர்கள் சுதந்திரமாகப் பயன்படுத்தும் தளமாக டிக்டாக் இயங்கும் எனவும் குறிப்பிட்டார். இதன் மூலம் 80 சதவீத பங்குகளை அமெரிக்க நிறுவனங்கள் பெற்று, 20 சதவீதம் மட்டுமே பைட்டான்ஸ் வைத்திருக்க முடியும் என்ற முடிவு எடுக்கப்பட்டுள்ளது.
இந்த நடவடிக்கை சீனாவை அடக்குமுறையில் வைக்க டிரம்ப் எடுத்த முக்கிய முயற்சியாக பார்க்கப்படுகிறது. அமெரிக்காவின் தொழில்நுட்ப, தரவு பாதுகாப்பு குறித்த அக்கறையும், சீனாவின் செல்வாக்கையும் சமநிலையில் வைத்திருக்கும் இந்த ஒப்பந்தம் உலகளவில் பெரும் விவாதத்துக்கு இடமாகியுள்ளது. இனி டிக்டாக் எந்த திசையில் செல்கிறது என்பது உலகம் முழுவதும் கவனிக்கப்படும் விஷயமாக மாறியுள்ளது.
