மத்திய அமெரிக்காவிலுள்ள கவுதமாலா நாட்டில் அண்மையில் தொடர்ந்து பல நிலநடுக்கங்கள் பதிவானது அந்நாட்டு மக்களை பெரும் அதிர்ச்சிக்கும் பீதிக்கும் உள்ளாக்கியுள்ளது. முதலாவது நிலநடுக்கம் ரிக்டர் அளவுகோலில் 5.2 ஆக இருந்தது. இது கவுதமாலா நகரத்திற்கு 60 கிலோமீட்டர் தொலைவில் மையம் கொண்டிருந்ததாக தெரிவிக்கப்படுகிறது.
அதனுடன் தொடர்ந்து, 3.9 முதல் 5.6 ரிக்டர் அளவுவரை பல்வேறு அதிர்வுகள் ஒரே நாளில் பதிவானதால், பொதுமக்கள் பதற்றத்தில் வீடுகளை விட்டு வெளியேறி, திறந்தவெளிகளில் தஞ்சம் புகுந்தனர். நிலநடுக்கத்தின் தாக்கத்தால் பல வீடுகள் மற்றும் கட்டடங்களில் சிறிய அளவிலான விரிசல்கள் ஏற்பட்டுள்ளதாக அங்குள்ள ஊடகங்கள் செய்தி வெளியிட்டுள்ளன.
முதற்கட்ட தகவலின்படி, உயிரிழப்பு அல்லது பெரிய அளவிலான பொருளாதார சேதம் எதுவும் பதிவாகவில்லை. இருப்பினும், நிலநடுக்கம் தொடரும் அபாயம் உள்ளதால், கவுதமாலா பேரிடர் மீட்பு குழுவினர் எச்சரிக்கையை கடுமையாக வெளியிட்டு, மக்கள் தங்கியிருக்கும் கட்டடங்களை உடனடியாக விட்டு வெளியேறும்படி அறிவுறுத்தியுள்ளனர்.
நிலநடுக்கம் பதிவான பகுதிகளில் மீட்பு மற்றும் அவசர சுகாதாரக் குழுவினர் தொடர்ந்து தீவிர நடவடிக்கையில் ஈடுபட்டுள்ளனர். பொதுமக்கள் பாதுகாப்பாக இருக்க தேவையான ஆதரவை அரசு வழங்குவதாகவும், மேலும் அதிர்வுகள் ஏற்படலாம் என்பதையும் பேரிடர் மேலாண்மை துறை தெரிவித்துள்ளது.
