ஸ்பேஸ் எக்ஸ் நிறுவனர் எலோன் மஸ்க் AI தொழில்நுட்பத்தைப் பயன்படுத்தி உருவாக்கப்பட்ட செவ்வாய் கிரகத்தின் வீடியோவை வெளியிட்டுள்ளார். 2016-ல் நடைபெற்ற ஒரு நிகழ்வில், ஸ்பேஸ் எக்ஸ் நிறுவனர் எலோன் மஸ்க் செவ்வாய் கிரகத்தில் மனித குடியேற்றம் குறித்த தனது பார்வையைப் பற்றி பேசினார். இந்த ஆண்டு செவ்வாய் கிரகத்திற்கு ஆளில்லா விண்கலத்தை அனுப்பவும் திட்டமிட்டுள்ளார்.
இந்நிலையில், செவ்வாய் கிரகத்தில் AI தொழில்நுட்பத்தின் உதவியுடன் ஒரு நகரத்தை உருவாக்கினால் எப்படி இருக்கும் என்று கற்பனையாக கிராபிக்ஸ் செய்து வீடியோ ஒன்றை வெளியிட்டுள்ளார். ‘செவ்வாய் கிரகத்துக்கு வருக’ என்ற தலைப்பில் வீடியோ ஒரு நிமிடம் 12 வினாடிகள் ஓடுகிறது. அதில், உயரமான கட்டிடங்களுக்கு இடையே சிறிய விண்கலங்களும், விமானங்களும் வட்டமிடுகின்றன. நகரின் அனைத்து கட்டமைப்புகளும் மிகவும் நவீனமானவை. சமூக வலைதளங்களில் வைரலாக பரவி வரும் இந்த வீடியோவை லட்சக்கணக்கானோர் பார்த்துள்ளனர்.
இதைப் பார்த்த சிலர் அங்கு சுவாசிக்கும் சூழல் இருக்குமா என்று கேள்வி எழுப்பியுள்ளனர். செவ்வாய் கிரகத்தின் நவீன நரகத்தில் மரங்கள், செடிகள், கொடிகள், ஆறுகள் அல்லது கடல்கள் போன்ற இயற்கை அம்சங்கள் எதுவும் இல்லை என்று சிலர் விமர்சித்துள்ளனர். “எலான் மஸ்க்கின் கனவை நான் நசுக்க விரும்பவில்லை. ஆனால் நான் இங்கு வாழ விரும்பவில்லை,” என்று மற்றொருவர் கூறினார்.
