ஜெருசலேம்: காசா பகுதியில் நீண்ட காலமாக நடைபெற்று வரும் போருக்கு முடிவு காணும் வகையில் புதிய சாத்தியம் உருவாகியுள்ளது. ஹமாஸ் அமைப்பு கையில் உள்ள பிணைக்கைதிகளை விடுவித்தால், காசா போரை நிறுத்த பேச்சுவார்த்தையைத் தொடங்குவதாக இஸ்ரேல் பிரதமர் பெஞ்சமின் நெதன்யாகு அறிவித்துள்ளார்.
2023 அக்டோபர் 7 அன்று ஹமாஸ் மேற்கொண்ட தாக்குதலால் 251க்கும் மேற்பட்டோர் கடத்தப்பட்டனர். அதற்கு பதிலடியாக காசா மீது கடுமையான தாக்குதலை இஸ்ரேல் தொடங்கியது. இதுவரை 62 ஆயிரத்திற்கும் மேற்பட்டோர் பலியாகியுள்ளனர். 75 சதவீத காசா பகுதிகள் தற்போது இஸ்ரேல் ராணுவ கட்டுப்பாட்டில் உள்ளன. சமீபத்தில் காசாவை முழுமையாக கைப்பற்றும் திட்டத்துக்கு ராணுவ அமைச்சரவை ஒப்புதல் தெரிவித்தது.
இந்நிலையில் பிரதமர் நெதன்யாகுவின் அறிவிப்பு முக்கியத்துவம் பெறுகிறது. ஹமாஸ் அமைப்பு மீதமுள்ள கைதிகளை விடுவித்து, இஸ்ரேலின் நிபந்தனைகளை ஏற்க வேண்டும் என்றார். அதற்கு இணங்கினால் போரை நிறுத்தும் முயற்சி ஆரம்பிக்கப்படும் என்றும் தெரிவித்தார். இது காசா மக்களுக்கு நம்பிக்கையை ஏற்படுத்தும் ஒரு செய்தியாக உள்ளது.
எனினும், இந்த அறிவிப்பை ஹமாஸ் ஏற்குமா என்பது கேள்விக்குறியாகவே உள்ளது. பாலஸ்தீன மக்களின் உயிரிழப்பு நாளுக்கு நாள் அதிகரித்து வருவதால், சர்வதேச சமூகம் இருதரப்பினரையும் உடனடி பேச்சுவார்த்தைக்கு அழைக்கிறது. சமாதானம் ஏற்படும் வரை அப்பாவி மக்கள் துன்பம் அனுபவிக்க வேண்டிய சூழல் நீடிக்கும் நிலையில், இஸ்ரேல் அறிவிப்பு புதிய மாற்றத்தைத் தூண்டியுள்ளது.
