மத்திய கிழக்கில் நீண்ட நாட்களாக நிலவி வரும் இஸ்ரேல்–ஹமாஸ் மோதல் மற்றும் பாலஸ்தீன மக்களின் துயர நிலையில், புதிய பரிணாமமாக, பிரான்ஸ் அதிபர் இமானுவேல் மேக்ரான், தனது நாடு பாலஸ்தீன அரசை அதிகாரபூர்வமாக அங்கீகரிக்கவுள்ளதாக அறிவித்துள்ளார். இது, பிராந்தியத்தில் அமைதி நிலை பெறும் முயற்சிக்கு முக்கிய துடிப்பாகவே பார்க்கப்படுகிறது.
“அமைதி மட்டுமே நிரந்தர தீர்வு. இதற்காக, பாலஸ்தீன அரசை நம்பிக்கையுடன் அங்கீகரிக்கிறோம்,” என மேக்ரான் தெரிவித்துள்ளார். ஐக்கிய நாடுகள் சபையின் பொதுச் சபை கூட்டத்திற்கு முன்னதாகவே இந்த முடிவு அமலுக்கு வரும் என்றும் அவர் கூறினார். காசாவில் போரை முடிவுக்கு கொண்டு வந்து, பொதுமக்களுக்கு நிவாரணம் வழங்குவது தான் இன்றைய அவசர முன்னுரிமையாகும் என்றும் அவர் வலியுறுத்தினார்.
ஆனால், இஸ்ரேல் பிரதமர் பெஞ்சமின் நெதன்யாகு இதற்கு கடுமையான எதிர்ப்பை தெரிவித்தார். இது பயங்கரவாதத்திற்கு நற்பலன் வழங்கும் நடவடிக்கையாக இருப்பதாக அவர் கூறினார். “அமைதிக்கான முயற்சியில்லை, ஒத்துழைப்பும் இல்லை. பாலஸ்தீனியர்கள் இஸ்ரேலுடன் அமைதி முயற்சிக்கத் தயாரில்லை” என்றார் நெதன்யாகு.
மாறாக, பாலஸ்தீனத் தலைவர்கள் இதை வரவேற்று, பிரான்சின் ஆதரவு அவர்கள் அரசின் நம்பகத்தன்மையையும், சர்வதேச சட்ட உரிமைகளையும் வலுப்படுத்தும் என்றனர். உலகளவில் தற்போது 140-க்கும் மேற்பட்ட நாடுகள் பாலஸ்தீன அரசை அங்கீகரித்துள்ளன என்பது குறிப்பிடத்தக்கது.
