டெஹ்ரான்: அணுசக்தி ஒப்பந்தம் குறித்த எந்தவொரு பேச்சுவார்த்தையும் அடுத்த வாரம் நடைபெறாது என ஈரான் வெளியுறவுத்துறை அமைச்சர் அப்பாஸ் அராக்சி தன்னம்பிக்கையுடன் அறிவித்துள்ளார். ஈரானின் அணுசக்தி திட்டங்கள் குறித்து அமெரிக்கா மற்றும் இஸ்ரேல் தொடர்ந்து கடும் எதிர்ப்பு தெரிவித்து வருகின்றனர். அணு ஆயுத உற்பத்தியை முடக்க வேண்டும் என்ற நோக்கில் இஸ்ரேல் கடந்த சில வாரங்களில் தாக்குதல் நடத்தியதையும், அமெரிக்கா மூன்று முக்கிய அணுசக்தி மையங்களை குறிவைத்து தாக்கியதையும் தொடர்ந்து பதிலடி நடவடிக்கைகள் தீவிரமடைந்துள்ளன.
இந்த தாக்குதல்களில் ஈரானின் போர்டோவ், நடான்ஸ் மற்றும் இஸ்பஹான் அணுசக்தி நிலையங்கள் பெரிதும் சேதமடைந்துள்ளன. இதனையடுத்து ஈரான் – இஸ்ரேல் இடையே நேரடி மோதல்கள் ஏற்பட்டு, மத்திய கிழக்கு பகுதியில் நிலவிய பதற்றம் இன்னும் தொடரும் சூழல் உருவாகியுள்ளது. இந்நிலையில், அணுசக்தி ஒப்பந்தத்துக்கான புதுப் பேச்சுவார்த்தையை அமெரிக்க அதிபர் டிரம்ப் அடுத்த வாரம் நடத்த திட்டமிட்டுள்ளதாக தெரிவித்திருந்தார்.
ஆனால், இதை நிராகரித்த ஈரான் வெளியுறவுத்துறை அமைச்சர் அராக்சி, ஈரான் செய்தி சேனலுக்கு அளித்த பேட்டியில், “அணுசக்தி ஒப்பந்தத்துக்கு எங்களால் இன்னும் உடன்பட முடியாது. அமெரிக்கா மற்றும் இஸ்ரேல் நடத்திய தாக்குதல்கள் எங்களை நம்ப முடியாத நிலைக்கு கொண்டு சென்றுள்ளன. இப்போது பேச்சுவார்த்தை நடத்துவது பயனற்ற ஒன்று. அமெரிக்காவின் இந்த செயற்பாடுகள், நம்மை மீண்டும் எதிர்மறையான முடிவுகளுக்கு இட்டுச் செல்கின்றன,” எனக் கூறினார்.
அணுசக்தி ஒப்பந்தத்தை மீண்டும் தொடங்குவதில் ஈரான் எச்சரிக்கையுடன் அணுகும் நிலையில், சர்வதேசத் தரப்பில் அடுத்த கட்ட நடவடிக்கைகள் பற்றி புதிய கவலைகள் எழுந்துள்ளன. அமெரிக்கா மற்றும் ஐரோப்பிய நாடுகள் ஈரானுடன் புதிய அமைதி முயற்சியில் இறங்க தயாராக இருந்தாலும், தற்போதைய சூழ்நிலையில் அந்த சாத்தியம் மிகக் குறைந்ததாகவே தெரிகிறது. மத்திய கிழக்கு பகுதியில் நிலவும் நிலைமை உலக அமைதிக்கு பெரும் சவாலாக இருக்கலாம் எனக் கூறப்படுகிறது.
