ஈராக் உளவுத்துறையுடன் இணைந்து அமெரிக்க ராணுவம் நடத்திய ஏவுகணை தாக்குதலில் அந்த அமைப்பின் செயல்பாடுகளை மேற்பார்வையிட்டு வந்த ஐ.எஸ்.ஐ.எஸ் உயர்மட்ட தலைவர் அபு காதிஜா கொல்லப்பட்டார். பயங்கரவாத எதிர்ப்பு நடவடிக்கைகளுக்கு ஆதரவாக ஈராக்கில் 2,500 அமெரிக்க வீரர்கள் நிறுத்தப்பட்டுள்ளனர். ஈராக்கின் தொலைதூர பகுதிகள் ஐஎஸ்ஐஎஸ் பயங்கரவாதிகளின் கட்டுப்பாட்டில் உள்ளன. ஐ.எஸ்.ஐ.எஸ் அமைப்பின் இரண்டாம் நிலை தலைவர் அபு காதிஜா தலைவராக உள்ளார்.
இவர் ஈராக்கில் இருந்து உலகின் பல நாடுகளில் ஐஎஸ்ஐஎஸ் அமைப்பின் செயல்பாடுகளை கவனித்து வந்தார். ஐஎஸ்ஐஎஸ் அமைப்புக்குத் தேவையான ஆயுதங்கள், பொருட்கள், நிதி ஆகியவற்றை பல நாடுகளுக்கு அனுப்பினார். ஈராக் மற்றும் சிரியாவில் உள்ள ஐஎஸ்ஐஎஸ் பயங்கரவாதிகள் அவரது கட்டுப்பாட்டில் இருந்தனர். 2023-ல் அமெரிக்கா அவருக்கு தடை விதித்தது. ஈராக்கின் அல்-அன்பர் பகுதியில் அபு கதீஜாவின் நடமாட்டம் குறித்து ஈராக் உளவுத்துறைக்கு தகவல் கிடைத்தது. இந்த தகவல் அங்குள்ள அமெரிக்க ராணுவத்துக்கு தெரிவிக்கப்பட்டது. அப்போது அபு கதீஜா தீவிரமாக கண்காணிக்கப்பட்டார். அபு காதிஜா பற்றிய தகவல் உறுதி செய்யப்பட்டதை அடுத்து அமெரிக்க ராணுவம் அங்கு ஏவுகணைத் தாக்குதல் நடத்தியது.
இதில் அபு காதிஜாவும் அவருடன் இருந்த மற்றொரு ஐஎஸ்ஐஎஸ் தீவிரவாதியும் கொல்லப்பட்டனர். அவர்கள் வெடிபொருட்கள் பொருத்தப்பட்ட தற்கொலை அங்கிகளை அணிந்திருந்தனர். ஈராக் மற்றும் அமெரிக்க அதிகாரிகள் டிஎன்ஏ சோதனைக்குப் பிறகு அபு காதிஜாவின் மரணத்தை உறுதிப்படுத்தினர். இதையடுத்து, ஈராக்கில் உள்ள அமெரிக்க தளபதி ஜெனரல் மைக்கேல் எரிக் குரில்லா, “உலகம் முழுவதும் ஐஎஸ்ஐஎஸ் அமைப்பின் செயல்பாடுகளை கண்காணித்த முக்கிய தலைவர் அபு காதிஜா.
அமெரிக்காவுக்கு அச்சுறுத்தலாக இருக்கும் ஐஎஸ்ஐஎஸ் பயங்கரவாதிகளை தொடர்ந்து வேட்டையாடி ஒழிப்போம்” என்றார். அபு காதிஜா கொல்லப்பட்டதை வரவேற்றுள்ள ஈராக் பிரதமர் முகமது ஷியா அல்-சூடானி, “ஈராக் மற்றும் உலகிற்கு மிகவும் ஆபத்தான பயங்கரவாதிகளில் அபு கதீஜாவும் ஒருவர். அமெரிக்க ராணுவத்தின் உதவியுடன் இந்த நடவடிக்கை மேற்கொள்ளப்பட்டது” என்றார்.
அமெரிக்க அதிபர் டிரம்ப் தனது ட்விட்டர் பக்கத்தில், “ஈராக்கில் ஐ.எஸ்.ஐ.எஸ் தலைவரை அமெரிக்கப் படைகள் வேட்டையாடிவிட்டன. அவரது பரிதாப வாழ்க்கை முடிந்துவிட்டது. அவருடன் மற்றொரு பயங்கரவாதியும் கொல்லப்பட்டார். இராக் மற்றும் குருது அரசுகளின் ஒத்துழைப்புடன் இந்த நடவடிக்கை மேற்கொள்ளப்பட்டது” என்று தெரிவித்துள்ளார்.
