ஜெருசலேம் நகரில் நேற்று இஸ்ரேல் பிரதமர் பெஞ்சமின் நெதன்யாகு உரையாற்றிய போது, “காசாவில் தொடர்ந்து சண்டையிடுவதைத் தவிர வேறு வழியில்லை” என தெரிவித்துள்ளார். இஸ்ரேல் மற்றும் ஹமாஸ் அமைப்பினருக்கிடையேயான போராட்டம் ஒன்றரை ஆண்டுகளுக்கும் மேலாக நீடித்து வருகின்றது. கடந்த ஜனவரியில் 42 நாட்களுக்கான முதற்கட்ட போர் நிறுத்த ஒப்பந்தம் செய்யப்பட்டிருந்தது.
அந்த ஒப்பந்த காலம் முடிவடைந்த பிறகு, போர் நிறுத்தத்தை நீட்டிக்க இஸ்ரேல் சில முக்கிய நிபந்தனைகளை முன்வைத்தது. முக்கியமாக, ஹமாஸ் பிணைக்கைதிகளை விடுவிக்காவிட்டால் தாக்குதல்களை மீண்டும் தொடங்குவதாக எச்சரிக்கையும் விடுத்திருந்தது. அந்த எச்சரிக்கைக்கு பின்னர், காசாவில் மீண்டும் தாக்குதல்கள் தொடங்கியன.
இதன்போது கடந்த 48 மணி நேரத்தில் மட்டும் 90 பேர் உயிரிழந்தனர் எனத் தகவல்கள் வெளியாகியுள்ளன. இந்த சூழலில், நெதன்யாகு மீண்டும் தனது கடுமையான நிலைப்பாட்டை வெளிப்படுத்தியுள்ளார்.
அவரது கூற்றுப்படி, “ஹமாஸ் அமைப்பு முற்றிலும் அழிக்கப்பட வேண்டும். அதே நேரத்தில் அவர்கள் கைதாக்கிய அனைத்து பிணைக் கைதிகளும் பாதுகாப்பாக மீட்கப்பட வேண்டும். இதுவரை எடுக்கப்பட்ட நடவடிக்கைகள் இந்த இலக்கை அடையுதற்காகவே. சண்டையிடுவதைத் தவிர இஸ்ரேலுக்கு வேறு வழியில்லை. இதன்மூலம் ஹமாஸ் படைகள் இனிமேல் எங்களுக்கு அச்சுறுத்தலாக இருக்க முடியாது என்பதையும் உறுதியாக நிரூபிக்க முடியும்” எனக் கூறியுள்ளார்.
இந்நிலையில், காசா பகுதியில் மீண்டும் வன்முறைகள் தீவிரமாகி வருவதால், அங்கு மனிதாபிமான பாதிப்புகள் அதிகரித்து வருகின்றன. உலக நாடுகள் இக்கழிப்பை விலக்கத் தூண்டி வரும் நிலையில், இஸ்ரேலின் உறுதியான போர் நடவடிக்கைகள் மீண்டும் சர்வதேச கவனத்தை ஈர்த்து வருகின்றன.
