ஒட்டாவா: நிஜ்ஜார் கொலை வழக்கில் இந்திய உளவாளிகளின் பங்கை நிரூபிக்க வலுவான ஆதாரம் இல்லை என கனடா பிரதமர் ஜஸ்டின் ட்ரூடோ ஒப்புக்கொண்டுள்ளார். வட அமெரிக்க நாடான கனடாவில், காலிஸ்தான் பிரிவினைவாதி ஹர்தீப் சிங் நிஜ்ஜார் கடந்த ஆண்டு ஜூன் மாதம் அடையாளம் தெரியாத நபர்களால் சுட்டுக் கொல்லப்பட்டார்.
கடந்த ஆண்டு செப்டம்பரில், இந்த கொலையில் இந்திய முகவர்களுக்கு தொடர்பு இருப்பதாக நாட்டின் பிரதமர் குற்றம் சாட்டியிருந்தார். இதற்கு மத்திய அரசு கடும் எதிர்ப்பு தெரிவித்தது. இதையடுத்து இருதரப்பு உறவுகளும் பாதிக்கப்பட்டன. நிஜ்ஜாரின் கொலையில் கனடாவுக்கான இந்திய தூதர் சஞ்சய் வர்மா உட்பட சில இந்திய தூதர்களை கனடா தொடர்புபடுத்தியது.
இதனால் கனடாவில் இருந்து சஞ்சய் வர்மா மற்றும் 5 இந்திய தூதர்கள் திரும்ப அழைக்கப்பட்டனர். செய்தியாளர் சந்திப்பில் ஜஸ்டின் ட்ரூடோ கூறியதாவது: நிஜ்ஜார் கொலையில் இந்திய உளவாளிகளுக்கு தொடர்பு இருப்பதாக உளவுத்துறையின் அடிப்படையில் நான் குற்றச்சாட்டை முன்வைத்தேன்.
இது தொடர்பாக, சமீபத்தில் நடைபெற்ற ஜி20 மாநாட்டில் கேள்வி எழுப்பியிருப்பேன். ஆனால் அதைத் தவிர்த்தோம். நிஜ்ஜார் கொலை வழக்கின் விசாரணையில் இந்தியாவின் ஒத்துழைப்பை எதிர்பார்த்தோம். இந்திய உளவாளிகளின் பங்கை நிரூபிக்க வலுவான ஆதாரம் இல்லை. அதற்கான ஆதாரத்தைக் கண்டறிய நாம் இணைந்து செயல்படலாம் என்றார்.
இதற்கு இந்தியா முன்வரவில்லை. விசாரணைக்கு இந்தியா ஒத்துழைக்கவில்லை. பிரதமர் மோடி தலைமையிலான மத்திய அரசுக்கு எதிராக உள்ள கனேடியர்கள் குறித்த தகவல்களை இந்திய தூதரக அதிகாரிகள் சேகரித்துள்ளனர். இந்தியா தனது இறையாண்மையை மீறியுள்ளது. இவ்வாறு அவர் கூறினார்.
