கொழும்பு: இலங்கைப் பொதுத் தேர்தலில் தேசிய மக்கள் சக்தி மூன்றில் இரண்டு பெரும்பான்மையைப் பெற்றதை அடுத்து, பிரதமர் மற்றும் புதிய அமைச்சர்கள் நியமனம் தொடர்பான செய்தியாளர் சந்திப்பு இன்று கொழும்பில் நடைபெற்றது. இது குறித்து பேசிய கட்சியின் பொதுச் செயலாளர் டில்வின் சில்வா, “புதிய அமைச்சரவையை திங்கட்கிழமை நியமிக்கவுள்ளோம்.
அமைச்சரவையில் அதிகபட்சமாக 25 பேர் இருப்பார்கள். இன்னும் குறைவாக 23 அல்லது 24 இருக்கலாம். அமைச்சர்களுக்கான துறைகள் அறிவியல் ரீதியாக ஒதுக்கப்படும். அதேவேளை பிரதி அமைச்சர்களின் எண்ணிக்கையும் அதிகமாக இருக்கும். முக்கிய அமைச்சுக்களுக்கு மேலதிகமாக பிரதி அமைச்சர்கள் நியமிக்கப்படுவார்கள்” என்று அவர் கூறினார்.
இலங்கையின் அரசியலமைப்பின் 46-வது சரத்தின்படி மொத்த அமைச்சரவை அமைச்சர்களின் எண்ணிக்கை 30 ஆக வரையறுக்கப்பட்டுள்ளது. பிரதி அமைச்சர்களின் எண்ணிக்கை 40-க்கு மிகாமல் இருக்க வேண்டும். எனினும் செலவினங்களைக் குறைக்க சிறிய அமைச்சரவையொன்று உருவாக்கப்பட உள்ளதாகத் தெரிவிக்கப்படுகிறது. இந்தத் தேர்தலில் எண்ணப்பட்ட மொத்த வாக்குகளில் 61.56 சதவீதத்தை என்பிபி வென்றது.
முன்னதாக 2010 தேர்தலில் முன்னாள் ஜனாதிபதி மஹிந்த ராஜபக்ஷவின் கட்சி 60.33 சதவீத வாக்குகளைப் பெற்றிருந்தது. அதேபோல், அதிக எண்ணிக்கையிலான வாக்குச் சாவடிகளையும் என்பிபி கைப்பற்றியுள்ளது. மொத்தமுள்ள 168 வாக்குச்சாவடிகளில் 152ஐ என்பிபி கைப்பற்றியுள்ளது. முன்னதாக ராஜபக்சவின் கட்சி 136 வாக்குச்சாவடிகளில் வெற்றி பெற்றிருந்தது.
மேலும், 22 மாவட்டங்களில் 21 மாவட்டங்களில் NPP வெற்றி பெற்றுள்ளது. இதற்கு முன் 2010-ல் ராஜபக்ஷ 19 மாவட்டங்களில் வெற்றி பெற்றது, இது மிகப்பெரிய வெற்றியாகும். இலங்கை அதிபர் தேர்தல் செப்டம்பர் 21-ம் தேதி நடந்தது. இதில் தேசிய மக்கள் சக்தி கூட்டணி சார்பில் போட்டியிட்ட அனுரகுமார திசாநாயக்க வெற்றி பெற்று புதிய அதிபராக பதவியேற்றார். இதனையடுத்து இலங்கை நாடாளுமன்றம் செப்டம்பர் 24-ம் தேதி கலைக்கப்பட்டது.
இலங்கை நாடாளுமன்றத்தில் மொத்தம் 225 உறுப்பினர்கள் உள்ளனர். இதில் 196 பேர் மக்களால் தேர்ந்தெடுக்கப்பட்டவர்கள். மீதமுள்ள 29 எம்.பி.க்கள் கட்சிகளின் வாக்கு சதவீதத்தின்படி தேர்ந்தெடுக்கப்படுகிறார்கள். இந்நிலையில், ஏற்கனவே அறிவித்தபடி கடந்த 14-ம் தேதி நாடாளுமன்ற தேர்தல் நடைபெற்றது. நாடு முழுவதும் 196 தொகுதிகளில் வாக்குப்பதிவு நடைபெற்றது. இதில், 69 சதவீத ஓட்டுகள் பதிவாகின. உடனடியாக வாக்குகள் எண்ணப்பட்டு முடிவுகள் அறிவிக்கப்பட்டன. ஜனாதிபதி அனுரகுமார திஸாநாயக்கவின் NPP கூட்டணி 141 ஆசனங்களை கைப்பற்றியுள்ளது. கூட்டணிக்கு 61 சதவீத வாக்குகள் கிடைத்தன.
இதன் அடிப்படையில் என்பிபி கூட்டணிக்கு கூடுதலாக 18 இடங்கள் கிடைத்தன. மொத்தத்தில் NPP கூட்டணி 159 இடங்களில் வெற்றி பெற்றது. அதேபோன்று வெற்றி பெற்ற ஆசனங்கள் மற்றும் வாக்கு வீதம் அடிப்படையில் சஜித் பிரேமதாசவின் ஐக்கிய மக்கள் சக்தி கட்சி 40 ஆசனங்களைப் பெற்றுள்ளது. முன்னாள் ஜனாதிபதி ரணில் விக்கிரமசிங்கவின் புதிய ஜனநாயக முன்னணிக்கு 5 ஆசனங்களும், முன்னாள் ஜனாதிபதி மஹிந்த ராஜபக்ஷவின் ஸ்ரீலங்கா பொதுஜன பெரமுன கட்சிக்கு 3 இடங்களும் கிடைத்துள்ளன. இலங்கைத் தமிழரசுக் கட்சிக்கு 8 ஆசனங்களும், ஸ்ரீலங்கா முஸ்லிம் காங்கிரஸ் கட்சிக்கு 3 ஆசனங்களும் கிடைத்துள்ளன.
மற்ற கட்சிகளுக்கு 7 இடங்கள் கிடைத்தன. தமிழர்கள் பெரும்பான்மையாக வாழும் பிரதேசங்களைப் பொறுத்த வரையில் மட்டக்களப்பு மாவட்டத்தைத் தவிர ஏனைய அனைத்துப் பிரதேசங்களிலும் NPP கூட்டணி அதிக ஆசனங்களைப் பெற்றுள்ளது. மட்டக்களப்பில் மாத்திரமே தமிழரசுக் கட்சி அதிக ஆசனங்களைப் பெற்றுள்ளது. யாழ்ப்பாணத்தில் என்.பி.பி கூட்டணி அதிக ஆசனங்களைக் கைப்பற்றியுள்ளது. அங்கு தமிழர் அல்லாத கட்சி அமோக வெற்றி பெற்றது இதுவே முதல் முறை. மலையகத் தமிழர்கள் அதிகம் வாழும் நுவரெலியா மாவட்டத்தில் NPP கூட்டணி முதலிடத்தைப் பிடித்துள்ளது. கண்டி, மாத்தளை, இரத்தினபுரி, கேகாலை, பதுளை, களுத்துறை போன்ற பிரதேசங்களில் இந்தக் கூட்டணி ஆதிக்கம் செலுத்தியுள்ளது.
இலங்கை நாடாளுமன்ற வரலாற்றில் முதல் தடவையாக NPP கூட்டணி மூன்றில் இரண்டு பெரும்பான்மையைப் பெற்றுள்ளது. 2020 நாடாளுமன்றத் தேர்தலில் மகிந்த ராஜபக்சவின் ஸ்ரீலங்கா பொதுஜன பெரமுன கட்சி 145 ஆசனங்களைக் கைப்பற்றியது. மூன்றில் இரண்டு பங்கு இடங்கள் குறைவாக இருப்பதால், முக்கியமான மசோதாக்களை நிறைவேற்ற சில எதிர்க்கட்சிகள் ஆதரிக்க வேண்டியிருந்தது. இப்போது NPP கூட்டணிக்கு மூன்றில் இரண்டு பெரும்பான்மை இருப்பதால், ஆளும் கூட்டணி எந்த மசோதாவையும் நாடாளுமன்றத்தில் எளிதாக நிறைவேற்ற முடியும்.
