நியூயார்க் நகரில் நடைபெற்று வரும் ஐக்கிய நாடுகள் பொதுச்சபை கூட்டத்தின் போது, வங்கதேச புலம்பெயர்ந்தோர் ஒன்று கூடி முகமது யூனுஸுக்கு எதிராக போராட்டத்தில் ஈடுபட்டனர். சிறுபான்மையினரின் நிலைமை மோசமடைந்து வருவதாகக் கூறி அவர்கள் ஆட்சிக்கு எதிராக கடும் கோஷங்களை எழுப்பினர். முன்னாள் பிரதமர் ஷேக் ஹசீனா பதவி விலகிய பின்னர் தாக்குதல்கள் அதிகரித்ததாக குற்றச்சாட்டு முன்வைக்கப்பட்டது.
அமெரிக்காவில் நடைபெற்று வரும் 80வது பொதுச்சபை அமர்வில் பல உலகத் தலைவர்கள் உரையாற்றி வரும் நிலையில், வங்கதேசத்தின் இடைக்கால அரசை எதிர்த்து மக்கள் சத்தம் எழுப்பினர். குறிப்பாக ஹிந்துக்கள் மற்றும் பிற மத சிறுபான்மையினருக்கு எதிரான வன்முறைகள் அதிகரித்துள்ளதாக கூறிய அவர்கள், யூனுஸ் பாகிஸ்தானுக்குத் திரும்பிச் செல்ல வேண்டும் என வலியுறுத்தினர்.
2024ஆம் ஆண்டிலிருந்து சிறுபான்மையினருக்கு எதிரான வன்முறை காரணமாக பலர் வங்கதேசத்தை விட்டு வெளியேறியுள்ளனர். பல குடும்பங்கள் தாக்குதலால் பாதிக்கப்பட்டுள்ளன. இந்த சூழலில் யூனுஸ் அதிகாரத்தை கைவிட்டு தேர்தலை நடத்த வேண்டும் என போராட்டக்காரர்கள் கோரிக்கை விடுத்தனர். வங்கதேசம் பயங்கரவாத நாடாக மாறிக்கொண்டிருக்கிறது என்ற குற்றச்சாட்டும் எழுப்பப்பட்டது.
முன்னாள் பிரதமர் ஹசீனா தலைமையிலான அரசு சட்டப்படி தேர்ந்தெடுக்கப்பட்டிருந்தும், சட்டவிரோதமாக பதவி நீக்கம் செய்யப்பட்டதாக புலம்பெயர்ந்தோர் தெரிவித்தனர். இதனால் ஐ.நா.வின் தலைமையகத்திற்கு வெளியே பரபரப்பான சூழல் நிலவியது. உலகம் முழுவதும் வங்கதேசத்தில் நடக்கும் சிறுபான்மையினரின் துயரங்கள் கவனத்தை ஈர்த்துள்ளன.
