உத்தரப்பிரதேச மாநிலத்தின் தலைநகர் லக்னோவில் ரூ.300 கோடியில் உருவாக்கப்பட்ட பிரம்மோஸ் ஏவுகணை உற்பத்தி ஆலை இன்று திறக்கப்பட்டது. இந்த ஆலை ஆண்டுக்கு 100 ஏவுகணைகளை தயாரிக்கும் திறன் கொண்டது.இந்த உற்பத்தி மையத்தை முதல்வர் யோகி ஆதித்யநாத் திறந்து வைத்தார். இது இந்தியாவின் தன்னிறைவு பாதுகாப்பு உற்பத்தி நோக்கை உறுதி செய்கிறது.
பிரம்மோஸ் ஏவுகணை என்பது இந்தியா மற்றும் ரஷ்யா கூட்டு தயாரிப்பாகும். இது பிரம்மபுத்திரா மற்றும் மஸ்க்வா நதிகளின் பெயர்களை இணைத்து ‘பிரம்மோஸ்’ என்று பெயரிடப்பட்டது.இந்த ஏவுகணையை பல நாடுகள் வாங்க ஆர்வம் காட்டி வருகின்றன. பிலிப்பைன்ஸ், பிரேசில், வியட்நாம், இந்தோனேசியா ஆகியவை ஒப்பந்தத்தில் கையெழுத்திட்டுள்ளன. புரூனே, சிலி, எகிப்து, மலேசியா, ஓமன், தென் ஆப்பிரிக்கா போன்ற நாடுகள் ஆர்வம் தெரிவித்துள்ளன.
பிரம்மோஸ் ஏவுகணை 290 முதல் 400 கி.மீ. வரை தாக்கும் திறன் கொண்டது. சில புதுப்பிக்கப்பட்ட மாடல்கள் 650 கி.மீ. வரை தாக்கக்கூடியவை. இது நிலம், கடல் மற்றும் ஆகாயத்தில் இருந்து ஏவக்கூடியது.இந்த ஏவுகணை போர்க்கப்பல், நீர்மூழ்கி, போர் விமானம் மற்றும் நிலத்தை சேர்ந்த அமைப்புகளிலிருந்து செலுத்தலாம். பல முனை தாக்குதல்களுக்கு இது ஏற்றது.
இந்த ஆலை ஆய்வுக்கும் பயன்படும். இது இந்தியாவின் ராணுவம் மற்றும் பாதுகாப்பு துறையில் தன்னிறைவு வளர்ச்சிக்கு முக்கிய தளமாகும்.இந்த திட்டத்துக்கான அடிக்கல் 2021ல் வைக்கப்பட்டது. தற்போது அதன் திறப்பு மூலம் இந்திய பாதுகாப்பு உற்பத்தியில் புதிய அத்தியாயம் தொடங்கியுள்ளது.பிரம்மோஸ் ஏவுகணை தற்போது இந்திய ராணுவத்தில் பல பிரிவுகளில் செயல்படுகிறது.இந்த வளர்ச்சி, இந்தியாவின் பாதுகாப்பு துறையில் வலிமை மற்றும் நம்பிக்கையை மேலும் உறுதிப்படுத்துகிறது.
