தமிழ் சினிமாவின் ஆகச்சிறந்த இயக்குநர்களில் ஒருவர் சேரன், இயக்குநர் மட்டுமல்ல இவர் ஒரு சிறந்த நடிகரும் கூட. இயக்குனர், தயாரிப்பாளர், பாடலாசிரியர் என பன்முக திறமை கொண்டு விளங்கும் சேரன், தமிழ் சினிமாவுக்கு பல அற்புதமான படங்களை கொடுத்துள்ளார். 1997 ஆம் ஆண்டு பார்த்திபன் மீனா நடிப்பில் பாரதி கண்ணம்மா என்ற படத்தை இயக்கியதன் மூலம் தமிழ் சினிமாவின் இயக்குநராக அறிமுகமானார்.
அதன் பின் இவர் இயக்கிய வெற்றி கொடி கட்டு, பாண்டவர் பூமி போன்ற படங்கள் தமிழ் சினிமாவில் தவிர்க்க முடியாத இயக்குநராக சேரனை அடுத்தகட்டத்துக்கு கொண்டு சென்றது. தனது படங்களின் மூலம் சமூகத்திற்கு தேவையான கருத்தை சொல்ல இவர் தவறியதில்லை, ஆட்டோகிராப், தவமாய் தவமிருந்து, பிரிவோம் சந்திப்போம், யுத்தம் செய் போன்ற படங்கள் இன்றும் பேசப்படும் ஒன்று. இயக்குநராக கலக்கிய இவர் பல படங்களில் தனது தனித்துவமான நடிப்பின் மூலம் ரசிகர்களை கவர்ந்தார்.
பிக் பாஸ் நிகழ்ச்சியில் பங்கேற்ற சேரனுக்கு ரசிகர்கள் பலரும் ஆதரவு கொடுத்தனர். தற்போது சில படங்களில் நடித்து வரும் சேரன் முதன் முறையாக மலையாள சினிமாவில் அறிமுகமாகவுள்ளார் அதுவும் எந்த பிரபல நடிகர் படத்தில் தெரியுமா? மலையாள சினிமாவின் சென்ஸேஷனல் நடிகராக வலம் வரும் டொவினோ தாமஸ் நடிக்கும் ‘நரிவேட்டா’ படத்தில் முக்கிய கதாபாத்திரத்தில் சேரன் நடிக்கவுள்ளார்.
இந்த படத்தை இஷ்க் பட இயக்குனர் அனுராக் மனோகர் இயக்கவுள்ளார். ஜூலை 26 ஆம் தேதி நரிவேட்டா படத்தின் படப்பிடிப்பு தொடங்கவுள்ளது, மேலும் மலையாள சினிமாவில் அறிமுகமாவது குறித்து சேரன் தனது X தளத்தில் பதிவு ஒன்றை வெளியிட்டுள்ளார். அந்த பதிவில், தனது நீண்ட நாள் ஆசை நிறைவேறியுள்ளதாகவும், உங்கள் அன்பும், ஆதரவும் வேண்டும் என்றும் குறிப்பிட்டுட்டுள்ளார்.
