முன்னாள் பிரதமர் இந்திரா காந்தியை ஹிட்லருடன் ஒப்பிட்ட வகையில் சமூக வலைதளத்தில் வெளியிடப்பட்ட சர்ச்சைக்குரிய பதிவுக்காக, பாஜக கர்நாடகாவின் ஐடிவிங் பிரிவுக்கு எதிராக முதல் தகவல் அறிக்கை (FIR) பதிவு செய்யப்பட்டுள்ளது. இந்த புகாரை கர்நாடகா மாநில காங்கிரசின் பொதுச் செயலாளர் எஸ். மனோகர் பதிவு செய்துள்ளார்.
பாஜக கர்நாடகாவின் அதிகாரப்பூர்வ X (முந்தைய ட்விட்டர்) பக்கமான @BJP4Karnataka இல் நேற்று வெளியிடப்பட்ட அந்த பதிவில், “இந்திரா இந்தியாவுக்கு சமமல்ல, இந்திரா = ஹிட்லர்” என எழுதி இருந்ததோடு, 38 விநாடிகள் ஓடும் வீடியோ ஒன்றும் இணைக்கப்பட்டிருந்தது.
இந்த வீடியோ, இந்தியாவில் 1975-இல் அமல்படுத்தப்பட்ட அவசரநிலை (Emergency) காலத்தை மையமாகக் கொண்டது. அதில் இருந்த கிராபிக்ஸ் காட்சிகள், இந்திரா காந்தியை அவமரியாதை செய்யும் வகையில் இருந்ததாகவும், மத மற்றும் சமூக குழுக்களில் வெறுப்பை தூண்டும் நோக்குடன் இருந்ததாகவும் FIR-ல் குறிக்கப்பட்டுள்ளது.
சர்ச்சையை தொடர்ந்து, தற்போது அந்த வீடியோ பதிவு நீக்கப்பட்டுவிட்டது. இந்த விவகாரம் மீதான சட்ட நடவடிக்கையை விரைந்து எடுக்க வேண்டும் என காங்கிரஸ் சார்பில் வலியுறுத்தப்பட்ட நிலையில், ஹை கிரவுண்ட்ஸ் காவல் நிலையம் FIR பதிவு செய்து விசாரணையைத் தொடங்கியுள்ளது.
இந்த விவகாரம் எதிர்க்கட்சிகள் மற்றும் சமூக வலைதளங்களில் பரபரப்பை ஏற்படுத்தியுள்ளது. இதற்கான காவல்துறையின் அடுத்த நடவடிக்கை என்னவாக இருக்கும் என்பது தற்போது நாடு முழுவதும் கணிக்கப்படும் முக்கிய உரையாடலாக மாறியுள்ளது.
