இந்திய விமானப்படை வீரரும் விண்வெளி பயணியுமான கேப்டன் சுபான்ஷூ சுக்லா, சர்வதேச விண்வெளி நிலையத்தில் நுழைந்த முதல் இந்தியர் என்ற பெருமையை பெற்றுள்ளார். அமெரிக்காவின் டிராகன் விண்கலத்தின் மூலம் நான்கு பேர் கொண்ட குழுவில் சேர்ந்து அவர் மேற்கொண்ட இந்த பயணம், இந்திய விண்வெளி வரலாற்றில் ஒரு புதிய சாதனையாக அமைகிறது. 14 நாட்கள் நீளமான இந்த பயணத்தில், 60க்கும் மேற்பட்ட அறிவியல் ஆய்வுகள் மேற்கொள்ளப்பட உள்ளன. இந்த நிலையில், அவர் பிரதமர் நரேந்திர மோடியுடன் நேரலை இணையவழி உரையாடலில் கலந்துகொண்டார்.
பிரதமர் மோடி உரையாற்றும் போது, “நீங்கள் புவியில் இல்லையென்றாலும், ஒவ்வொரு இந்தியரின் மனதிலும் இருக்கிறீர்கள். உங்கள் பயணம் புதிய சகாப்தத்தின் தொடக்கம். 140 கோடி மக்களின் உற்சாகமும், பாராட்டுகளும் உங்களை நோக்கி செல்கின்றன. தேசியக் கொடியை விண்வெளியில் ஏந்தியதற்காக உங்கள் சாதனை பாராட்டுக்குரியது,” என தெரிவித்தார். சுபான்ஷூ சுக்லா இந்தியா சார்பில் நம் தேசத்தின் கனவுகளை சாத்தியமாக்கும் முயற்சியில் முன்னிலை வகிக்கிறார் என்பதையும் அவர் வலியுறுத்தினார்.
சுபான்ஷூ சுக்லா பிரதமருக்கு பதிலளிக்கையில், “இந்த பயணம் என் தனிப்பட்டது அல்ல, நாடு முழுவதற்கும் சேர்ந்தது. இந்தியா இப்போது தனது விண்வெளி கனவுகளை நிறைவேற்றும் ஒரு புதிய பாதையில் பயணிக்கிறது. நமது நாட்டின் தலைமை புதிய வாய்ப்புகளை உருவாக்குகிறது. விண்வெளியில் இருந்து இந்தியாவைப் பார்த்தபோது, அது மிகப்பெரியதாய், பிரமாண்டமாகத் தோன்றுகிறது” என்றார். மேலும், அவர் எடுத்துச் சென்ற கேரட் அல்வா மற்றும் பாசிபருப்பு அல்வா போன்ற உணவுகளை சக விண்வெளி வீரர்களுடன் பகிர்ந்ததாகவும், அனைவருக்கும் அது மிகவும் விருப்பமானதாக இருந்ததையும் பகிர்ந்தார்.
அதனைத் தொடர்ந்து, பூமியை சுற்றும் சுற்றுப்பாதையில் இருந்து சூரிய உதயத்தையும் அஸ்தமனத்தையும் ஒரே நாளில் 16 முறை காண்பது ஒரு புதிய அனுபவம் எனக் கூறினார். சிறுவயதில் இந்த நிலையை எட்டுவேன் என கனவில் கூட நினைத்ததில்லை என்ற அவர், இப்போது அந்த கனவின் பாகமாக இருப்பதில் பெருமை அடைகிறேன் என உணர்வுபூர்வமாக தெரிவித்தார். மிகக் கடுமையான சூழ்நிலைகளை சந்தித்தாலும், மனநிலையை சமநிலையாக்கிக் கொண்டு செயல்படுவதில் தான் வெற்றி இருக்கிறது என்றார்.
