சூப்பர்ஸ்டார் ரஜினிகாந்த் தனது வாழ்க்கை வரலாற்றை எழுதி வருவதாக சமீபத்தில் இயக்குநர் லோகேஷ் கனகராஜ் உறுதிப்படுத்தினார். இதனைத் தொடர்ந்து, ரஜினியின் வாழ்க்கை படமாக உருவாகுமா? அதில் ரஜினியாக யார் நடிப்பார்? என்ற கேள்விகள் ரசிகர்கள் மத்தியில் பெரும் விவாதமாக மாறியுள்ளது. இந்த விவாதம் சமூக வலைதளங்களில் அதிகம் பேசப்பட்டு வருகிறது.
பலரும், ரஜினியின் வாழ்க்கையை திரையிடும் உரிமையை அவர் ஒப்புக்கொள்வாரா? என்ற கேள்வியையும் எழுப்புகின்றனர். ஒருவேளை அவர் ஒப்புக்கொண்டால், யார் இயக்குவர்? யார் நடிப்பர்? என்பது ரசிகர்களுக்கு பெரிய எதிர்பார்ப்பை உருவாக்கியுள்ளது. தனுஷ், சிவகார்த்திகேயன், சிம்பு ஆகியோர் மூவரும் ரசிகர்களால் பரிந்துரைக்கப்படுகின்றனர். இவர்களில் யார் சரியான தேர்வு என்பது பற்றி சமூக வலைதளங்களில் பலரும் தங்கள் கருத்துகளை பகிர்ந்து வருகின்றனர்.
தனுஷ் ஏற்கனவே இளையராஜாவின் வாழ்க்கை வரலாற்றில் நடிக்க ஆசை இருந்தது நிறைவேறியதாக கூறியுள்ளார். அதேபோல் ரஜினியின் வாழ்க்கை வரலாற்றிலும் அவர் நடிக்க விருப்பம் கொண்டிருப்பது தெரிகிறது. சிவகார்த்திகேயனின் தோற்றமும், உடல் மொழியும் ரஜினியை நினைவுபடுத்துகிறது என்பதே அவரது ரசிகர்கள் கூற்று. அதேபோல், சிம்புவின் ரசிகர்களும், அவரே சரியான தேர்வு என வாதாடுகின்றனர். இம்மூவரும் ரஜினியின் தீவிர ரசிகர்கள் என்பதாலும், அவர்கள் நடிப்புக்கு ஆர்வம் கொண்டிருப்பது இயற்கையானதே.
ஜெயிலர் 2 திரைப்படத்திற்குப் பிறகு ரஜினி சிறிய இடைவேளை எடுப்பதாகவும், அந்த இடைவேளையில்தான் அவர் வாழ்க்கை வரலாற்றை எழுத முடிக்கப்போவதாகவும் தகவல்கள் தெரிவிக்கின்றன. லோகேஷின் உரையால் இது உறுதியாகும். இந்த நிலையில், அவரது பயோபிக் திரைப்படம் உருவாகும் வாய்ப்பு மிக அதிகம் எனக் கருதப்படுகிறது. யார் ரஜினியாக நடிப்பார்கள்? யார் இயக்குவர்? என்பதை நேரமே தீர்மானிக்கப் போகிறது.
