புதுக்கோட்டை மாவட்டத்தின் கீரமங்கலத்தில் இன்று ‘அகல் விளக்கு’ என்ற புதிய திட்டத்தை பள்ளிக்கல்வித்துறை அமைச்சர் அன்பில் மகேஷ் பொய்யாமொழி தொடங்கி வைத்தார். இந்த திட்டம் கடந்த ஆண்டு சட்டப்பேரவையில் அறிவிக்கப்பட்டதின் தொடர்ச்சியாக செயல்பாட்டிற்கு வந்துள்ளது.
இந்த திட்டம் 9-ம் வகுப்பு முதல் பிளஸ் 2 வரை உள்ள மாணவிகளை மனரீதியாகவும், உடலாரோக்கியத்திலும், சமூக சூழ்நிலையிலும் ஏற்படும் இடையூறுகளில் இருந்து பாதுகாப்பதற்கானது. கல்வித்துறை அதிகாரிகள் கூறுகையில், இத்திட்டம் மாணவிகள் எதிர்கொள்ளும் பல்வேறு பிரச்சனைகளுக்கு நுட்பமான, தோழமை சார்ந்த தீர்வுகளை வழங்கும் எனத் தெரிவித்தனர்.
மாணவிகள் இன்று சமூக வலைதளங்கள், சினிமா, நாடகங்கள் போன்ற ஊடகங்களின் தாக்கத்தால் உளவியல் சிக்கலுக்கு ஆளாகின்றனர். இவை நேரடியாக அவர்களின் கல்விச் செயல்திறனை பாதிக்கிறது. பெற்றோரிடமும், ஆசிரியர்களிடமும் மாணவிகள் தங்களை திறந்துவைக்க முடியாமல் தவிக்கின்றனர்.
இதனால் ஆசிரியர்கள், மாணவிகளுடன் தோழமையாக இருந்து, அவர்கள் சந்திக்கும் பிரச்சனைகளை புரிந்து கொண்டு வழிகாட்டும் புதிய பார்வையுடன் செயல்படவுள்ளனர். ‘அகல் விளக்கு’ திட்டத்தின் கீழ் ஒவ்வொரு பள்ளியிலும் குழுக்கள் அமைக்கப்படுகின்றன. இதில் மாணவிகள் மற்றும் ஆசிரியைகள் இணைந்து செயல்படுவர்.
இத்திட்டத்திற்கு ஒரு விழிப்புணர்வு கையேடு உருவாக்கப்பட்டுள்ளது. இதில் மாணவிகள் சந்திக்கும் பிரச்சனைகள் மற்றும் அவற்றுக்கான தீர்வுகள் தெளிவாக விளக்கப்பட்டுள்ளன.
மாணவிகளின் உளவியல் நலன் மற்றும் பாதுகாப்பை முதன்மையாகக் கொண்டு செயல்படும் இந்த திட்டம், பள்ளி கல்வித்துறையின் முன்னோடி முயற்சியாக கருதப்படுகிறது. தமிழகம் முழுவதும் அமல்படுத்தப்படும் இந்த திட்டம், மாணவிகள் மீது நேர்மறை தாக்கத்தை ஏற்படுத்தும் என எதிர்பார்க்கப்படுகிறது.
