சேலம்: அனைத்து தரப்பு மக்களையும் மகிழ்ச்சியடையச் செய்யும் வகையில் 2026 சட்டமன்றத் தேர்தலில் சிறப்பு தேர்தல் அறிக்கை வெளியிடப்படும் என்று அதிமுக பொதுச் செயலாளர் பழனிசாமி தெரிவித்தார். மாற்றுக் கட்சிகளில் இணைந்தவர்கள் அதிமுகவில் சேருவதற்கான நிகழ்ச்சி சேலம் மாவட்டம் ஓமலூரில் நேற்று நடைபெற்றது.
அதிமுகவில் இணைந்தவர்களை வரவேற்று கட்சியின் பொதுச் செயலாளர் பழனிசாமி கூறியதாவது:- அதிமுக ஆட்சிக் காலத்தில், சேலம் மாவட்டம் முழுவதும் சாலைகள், அணைகள் மற்றும் பல்வேறு உள்கட்டமைப்பு வசதிகள் கட்டப்பட்டன. தற்போது சேலத்தில் நெசவுத் தொழில் சரிவைச் சந்தித்துள்ளது. மீண்டும் அதிமுக அரசு ஆட்சிக்கு வரும் என்று மக்கள் எதிர்பார்க்கின்றனர்.
அதிமுக அரசு ஆட்சிக்கு வந்ததும் நெசவுத் தொழில் வளர்ச்சிக்கு உதவுவோம். அதிமுக ஆட்சிக் காலத்தில், மேட்டூர் அணையிலிருந்து 100 ஏரிகளை நிரப்பும் திட்டம் தொடங்கப்பட்டு 6 ஏரிகளுக்கு தண்ணீர் கொண்டு வரப்பட்டது. ஆனால், இந்தப் பணிகள் திமுக ஆட்சியின் கீழ் மெதுவாக நடந்து வருகின்றன. இது அதிமுகவின் திட்டம் என்பதால் திமுக அரசு இதை கருத்தில் கொள்ளவில்லை. பல ஏரிகள் வறண்டு வருகின்றன. அதிமுக அரசு மீண்டும் ஆட்சிக்கு வந்ததும் இந்த திட்டம் முழுமையாக செயல்படுத்தப்படும். வரவிருக்கும் சட்டமன்றத் தேர்தலில் அனைத்து மக்களையும் மகிழ்ச்சியடையச் செய்யும் வகையில் தேர்தல் அறிக்கை வெளியிடப்படும். இவ்வாறு பழனிசாமி கூறினார்.
பின்னர், பழனிசாமி ஊடகங்களுக்கு அளித்த பேட்டியில், “தமிழ்நாட்டு மக்கள் எம்ஜிஆரை கடவுளாகப் பார்க்கிறார்கள். அவரை விமர்சித்தால், அவர்கள் அரசியலில் இருந்து மறைந்துவிடுவார்கள். அதிமுக சாதி, மதத்தில் ஆர்வம் காட்டுவதில்லை. திமுக கூட்டணிக் கட்சிகளிடையே கருத்து வேறுபாடுகள் இருப்பதால், தேர்தல் வரை திமுக கூட்டணி நிலைத்து நிற்குமா என்ற சந்தேகம் உள்ளது. சட்டமன்றத் தேர்தல் இன்னும் 8 மாதங்களே உள்ளதால், அதிமுக தலைமையில் ஒரு சிறப்பு கூட்டணி அமைக்கப்படும்,” என்று அவர் கூறினார்.
